Illum, Malta tospita lill-Iżrael fl-Istadium Nazzjonali għal partita ta’ ħbiberija.
Bla dubju, wara t-telfa diżappuntanti ta’ 2-1 kontra l-Estonja, valida mill-UEFA Nations League, dan il-konfront ftit li xejn għandu importanza.
Il-coach nazzjonali, Devis Mangia, irid jagħraf kif jgħolli l-moral tal-players li bħalissa huwa ferm baxx wara li l-objettiv ewlieni ma ntlaħaqx.
Fil-logħba kontra l-Estonja, li ntlagħbet f’Tallinn, il-Maltin lagħbu għal taqsima sħiħa bi player inqas wara t-tkeċċija tad-difensur Jean Borg fil-ħin miżjud tal-ewwel taqsima.
Fil-veritá, il-wirja kienet diżappuntanti u minkejja li ksibna d-draw permezz ta’ penalty skorjat minn Teddy Teuma, kienet diffiċli biex nagħmlu reazzjoni minħabba l-fatt li l-avversarji rtiraw lura biex jissalvagwardjaw ir-riżultat konxji mill-fatt li l-Maltin riedu jiskorjaw żewġ goals biex jiksbu l-promozzjoni għal League C.
Anke l-fatt li gawdejna ħafna mill-pussess tal-ballun, ma konniex daqstant perikolużi minħabba li qatt ma nkwadrajna xutt fil-lasti.
U meta ppruvajna nagħmlu dan … ikkommettejna żball f’nofs il-ground u kkastigawna bit-tieni goal.
Peró issa hemm bżonn li ssir l-”awtopsja” u nħarsu ‘l quddiem. Iżda wieħed irid japprezza l-fatt li l-għażla tal-coach nazzjonali hija waħda limitata u l-influss tal-players barranin fil-kampjonat domestiku jibqa’ ta’ detriment kbir għat-team nazzjonali.
Din il-partita tal-lum għandha tintuża biex jinbena futur ġdid u Devis Mangia (ritratt) għandu jkompli jibni fuq il-pedamenti li diġá għandu. Wara l-Iżrael se nilagħbu kontra l-Irlanda f’Novembru li ġej … u għaldaqstant bejn logħba u oħra se jkun hemm differenza ta’ xahrejn.
F’konferenza tal-aħbarijiet, Mangia sostna li se jkun hemm bosta bidliet:
“Se jsiru bosta bidliet biex naraw il-wirjiet ta’ dawk il-players li fil-passat ma ngħatawx l-ispazju meħtieġ matul il-logħbiet internazzjonali passati.”
“L-għan huwa li ngħinu lill-players individwali kif ukoll lit-team biex itejbu l-prestazzjoni tagħhom u jiksbu aktar esperjenza fit-tħejjija għall-partiti internazzjonali li jmiss, jiġifieri, dawk tar-round ta’ kwalifikazzjoni tal-EURO 2024,” sostna Mangia
Waqt li tkellem dwar is-sistema adottata minnu, huwa spjega li waqt il-konfront kontra l-Estonja, l-idea kienet li jiġu antiċipati l-blalen għoljin. Huwa stqarr li t-team ikkommetta bosta żbalji fl-ewwel taqsima, u f’sitwazzjonijiet ta’ 1v1, il-Maltin naqsu li jirbħu l-ballun minħabba li l-avversarji kienu aktar veloċi.
Zach Muscat aktarx jitlef il-logħba ta’ nhar it-Tlieta minħabba li qed jirkupra minn injury li sofra waqt it-taħriġ.
“Din se tkun logħba diffiċli għax l-Iżrael huma team qawwi li għadu kif rebaħ il-promozzjoni għal League A fil-UEFA Nations League,” temm jgħid Mangia.
L-istess tenna Joseph Mbong, li bħalissa qed jilgħab fl-Iżrael. Huwa qal li l-kampjonat huwa wieħed ta’ intensità għolja li jintlagħab fuq il-veloċitá u s-saħħa.
Mbong stqarr li l-kampjonat Iżraelit għenu biex itejjeb il-livell tiegħu kif ukoll jimmatura bħala player.
Intant, il-coach huwa Alon Hazan, 55 sena, u ilu jmexxi lit-team mit-8 ta’ Mejju li għadda. Meta kien player irrappreżenta lill-Iżrael għal 72 darba li fihom skorja ħames goals.
Malta u l-Iżrael se jkunu qed jiltaqgħu għad-disa’ darba fl-istorja. L-Iżraeliti rebħu sitt darbiet filwaqt li ż-żewġ logħbiet oħra spiċċaw fi draws.
L-ewwel darba li Iżrael u Malta ltaqgħu kien fl-1984 fejn f’Ġerusalem kienu rebħu bl-iskor ta’ 2-1.
L-aħħar darba li dawn iż-żewġ nazzjonijiet iltaqgħu kien fil-11 ta’ Ottubru 2011 meta fl-Istadium Nazzjonali, l-avversarji kienu ħarġu rebbieħa bl-iskor ta’ 2-0.
Bejn iż-żewġ timijiet ġew skorjati 22 goal li 16 minnhom waslu min-naħa tal-Iżrael.
Is-sitt skorers Maltin kienu Charles Muscat (6 ta’ Settembru, 1984 – partita ta’ ħbiberija); Dennis Mizzi (2 ta’ Diċembru, 1987 – partita ta’ ħbiberija); David Carabott (11 ta’ Jannar 1989 – partita ta’ ħbiberija); Michael Misud u David Carabott (10 ta’ Settembru 2003 – Kampjonat Ewropew); Jamie Pace (2 ta’ Settembru 2010 – Kampjonat Ewropew).
Il-logħba tibda fid-9.00 pm u se tintwera diretta fuq TVM News+.
