Illum tintlagħab il-finali tal-UEFA Europa League bejn iż-żewġ timijiet Ingliżi, Manchester United u Tottenham, f’San Mames Stadium, f’Bilbao, liema partita tibda fid-9.00 pm.
Din il-finali qed tqajjem bosta mistoqsijiet minħabba li se tintlagħab bejn żewġ timijiet li kellhom staġun diżastruż hekk kif jinsabu fis-16 u fis-17-il postijiet fil-klassifika tal-Premier League Ingliż, li jfissru, l-aħħar żewġ postijiet qabel iż-żona l-ħamra.
Fit-tliet partiti bejn iż-żewġ timijiet Ingliżi f’dan l-istaġun, Tottenham ħarġu rebbieħa fit-tliet okkażjonijiet.
Fl-ewwel laqgħa fil-Premier League, il-players ta’ Ange Postecoglou għelbu lil dawk ta’ Erik ten Hag bl-iskor ta’ 3-0 qabel ma ż-żewġ timijiet reġgħu ltaqgħu fil-League Cup, fejn Spurs ħarġu rebbieħa bl-iskor ta’ 4-3 fuq l-istess Red Devils, din id-darba mmexxija minn Ruben Amorim.
Imbagħad Spurs għelbu lill-United għat-tieni darba fl-istaġun fil-kampjonat meta James Maddison skorja l-uniku goal tal-partita.
Fil-bidu tal-istaġun, il- manager Awstraljan kien mistenni jkompli jibni fuq l-istaġun li għadda wara li Spurs temmew fil-ħames post tal-klassifika u b’ritorn għall-UEFA Champions League.
Iżda sfortunatament, il- pjani tiegħu tħarbtu għal kollox minħabba l-bosta injuries li diversi players sofrew bil-konsegwenza li xejn ma kienu konsistenti biex il-prestazzjonijiet tagħhom kienu medjokri għall-aħħar u ma kienet l-ebda sorpriża li jinsabu fis-17-il post tal-klassifika.
Filwaqt li Spurs ġew eliminati fis-semi-finali tal-League Cup b’aggregate ta’ 4-0 kontra Liverpool, huma spiċċaw fir-raba’ post fil-klassifika tal-kampjonat tal-UEFA Europa League u għelbu lit-timijiet ta’ AZ Alkmaar, Eintracht Frankfurt, u Bodo-Glimt biex ikkwalifikaw għall-finali tal-lum.
Filwaqt li Tottenham kisbu 20 rebħa fl-istaġun li għadda biex spiċċaw fil-ħames post, huma sofrew 21 telfa f’dan l-istaġun liema ċifra hija inaċċettabbli għal-livell tagħhom.
U ma kienet l-ebda sorpriża li fil-ġimgħat li għaddew, ħarġet l-aħbar li Postecoglu se jitkeċċa mill-kariga tiegħu anke jekk jirbħu dan l-unur.
Bħal Tottenham, ir-Red Devils kienu milquta minn bosta injuries u taħt it- tmexxija tal-manager, Erik ten Hag, kienu għaddejin minn forma fqira, tant, li f’Novembru li għadda tkeċċa mid-dmirijiet tiegħu meta kienu qed jokkupaw l-14-il post kif ukoll naqas li jirbaħ l-ewwel tliet partiti tal-Europa League fil-fażi tal-kapjonat. Iżda taħt ir-responsabbiltá ta’ Rubin Amorin, it-team niżel fis-16-il post.
Peró f’din il-kompetizzjoni t-team wera konsistenza biex kien jimmeritah jikkwalifika għall-finali … u huwa l-uniku team li għadu ma ġiex megħlub f’din il-kompetizzjoni Ewropea f’dan l-istaġun.
Nhar il-Ġimgħa li għadda, huma sfaw megħluba għand Chelsea bl-iskor ta’ 1-0, bil-goal jasal minn Marc Cucurella, biex din kienet it-18-il telfa tagħhom tal-istaġun.
Aktar minn hekk, ilhom ma jirbħu għal dawn l-aħħar tmien partiti .. li hija l-akbar sensiela negattiva tagħhom fil-Premier League.
Il-pressjoni hija ċertament fuq iż-żewġ timijiet. Dan minħabba li minkejja li jinsabu fin-naħa t’isfel tal-klassifika, huma jridu jirbħu dan l-unur minħabba li permezz tiegħu jikkwalifikaw għall-UEFA Champions League u jirċievu pakkett finanzjarju kbir kif ukoll li jippermettilhom li jattiraw players ta’ klassi mondjali.
Jidher li wara li mpressjona kontra Aston Villa, il-goalkeeper Antonin Kinsky, se jkun preferut minn Guglielmo Vicario, b’Rodrigo Bentancur, Dominic Solanke, Brennan Johnson u Pedro Porro wkoll se jirritornaw.
Heung-min Son, li lagħab għall-ewwel darba kontra l-Villans wara injury fit-tul, mistenni li jżomm postu iżda Dejan Kulusevski, James Maddison, Lucas Bergvall, Timo Werner u Radu Dragusin se jkunu kollha neqsin minħabba li qed jirkupraw minn injury.
Min-naħa ta’ Manchester United, Mason Mount u Amad Diallo, mistennija li jkunu fil-formazzjoni inizjali wara li ħallew impressjoni tajba fis-semi-finali kontra Athletic Bilbao.
Iżda Matthijs de Ligt, Leny Yoro u Diogo Dalot huma kollha dubjużi filwaqt li Lisandro Martinez u Joshua Zirkzee jinsabu mweġġgħin.
Ir-referee se jkun il-Ġermaniż, Felix Zwaye, u se jkun assistit mill-kompatrijotti, Robert Kempter u Christian Dietz
