Illum jintemm l-istaġun bil-finali tal-UEFA Champions League, f’Ataturk Stadium, fil-belt ta’ Istanbul, fit-Turkija, bejn Manchester City u Inter fejn it-team Ingliż jimmira li jirbaħ Treble storiku wara li rebaħ il-kampjonat Ingliż kif ukoll l-FA Cup.
Inċidentalment, l-aħħar unur li rebħu dawn iż-żewġ timijiet kien it-tazza domestiku bl-iskor identiku ta’ 2-1 hekk kif is-Citizens għelbu lir-rivali eterni Manchester United filwaqt li n-Nerazzurri rebħu lil Fiorentina.
U filwaqt li Manchester City qed ifittxu l-ewwel suċċess f’din il-kompetizzjoni, Inter jistgħu jiftaħu li rebħuha tliet darbiet – 1963–64 (v Real Madrid 3-1), 1964–65 (v Benfica 1-0), 2009–10 (v Bayern Munich 2-0).
Min-naħa tat-team Ingliż, l-unika dehra tagħhom f’finali ta’ din il-kompetizzjoni kienet fl-2020/21 meta kienu sfaw megħluba minn Chelsea bl-iskor ta’ 1-0, bl-uniku goal jasal minn Kai Havertz.
Iżda fil-finali tal-lum huma se jibdew bħala l-favoriti netti li jgħollu t-tazza ta’ widnejha kbar!
Dan minħabba li l-coach Pep Guardiola rnexxielu jibni team qawwi u bħal donnhom f’dawn l-aħħar xahrejn laħqu l-quċċata u ħadd ma seta’ jwaqqaf il-furja tagħhom u bħal urugan kaxkru dak kollu li sabu quddiemhom.
L-erba’ players li huma l-arma letali tat-team huma, bla dubju, it-tliet midfielders Kevin De Bruyne, Bernardo Silva u Ilkay Gundogan … u l-attakkant Erling Haaland … meqjus bħala “l-annimal uman”.
Iżda Inter għandhom il- formula tagħhom kif jistgħu jwaqqfu l-magna tas-City u żgur li studjaw kull moviment u kull mossa tal-avversarji tagħhom.
Biex waslu sal-finali, il- Manchunians rebħu Grupp G u għelbu b’aggregate lil Leipzig 8-1 (l-Aħħar 16); Bayern Munich 4-1 (kwarti-finali) u Real Madrid 5-1 (semi-finali).
Min-naħa tal-Interisti, spiċċaw fit-tieni post ta’ Grupp C u għelbu b’aggregate lil Porto 1-0 (l-Aħħar 16); Benfica 5-3 (kwarti-finali); Milan 3-0 (semi-finali).
L-Ingliżi għandhom lil Nathan Ake dubjuż filwaqt li Henrikh Mkhitaryan u Joaquin Correa huma dubjużi għat-Taljani.
Il-line-ups probabbli:
Man City: Ederson, Kyle Walker, Ruben Dias, Nathan Ake, Bernardo Silva, John Stones, Rodri, Jack Grealish, Kevin De Bruyne, Ilkay Gundogan, Erling Haaland Coach: Pep Guardiola
Inter: Andre Onana, Matteo Darmian, Francesco Acerbi, Alessandro Bastoni, Denzel Dumfries, Nicolo Barella, Hakan Calhanoglu, Marcelo Brozovic, Federico Dimarco, Edin Dzeko, Lautaro Martinez – Coach: Simone Inzaghi
Referee: Szymon Marciniak (Polonja)
