Hekk kif minn dan l-istaġun il-format tal- Champions League inbidel minn dak tal-Fażi tal-Gruppi għal dak tal-Kampjonat fejn qed jieħdu sehem 36 team li kull wieħed minnhom irid jilgħab kontra tmien avversarji differenti, fuq bażi ta’ erbgħa home u erbgħa away, l-aktar żewġ partiti li jiġbdu l-attenzjoni f’din l-ewwel ġurnata huma Milan v Liverpool u Manchester City v Inter.
Milan v Liverpool– Din hija sfida klassika bejn żewġ timijiet prestiġjużi, li għandhom storja kbira f’din il-kompetizzjoni … bl-aktar memorija li tibqa’ tidwi fl-imħuħ tal-partitarji hija l-finali tal-2005 li ntlagħbet f’Istanbul.
Kollox deher li Milan kienu se jirbħu meta fetħu vantaġġ ta’ tliet goals. Iżda Liverpool irkupraw dan l-iżvantaġġ biex ħarġu rebbieħa bl-għoti tal-penalties.
Peró mbagħad, sentejn wara dawn iż-żewġ timijiet reġgħu ltaqgħu fil-finali, f’Ateni, fejn kienu Milan li ħarġu rebbieħa bl-iskor ta’ 2-1.
Intanti, illum ir-Rossoneri jospitaw lir-Reds li bħalissa huma feruti mit-telfa xejn mistennija f’darhom kontra Nottingham Forest bl-iskor ta’ 1-0.
Il-moral huwa baxx u l-manager, Arne Slot, irid jirriorganizza lill-players tiegħu hekk kif se jiffaċċjaw team li ġej minn rebħa kbira ta’ 4-0 fuq Venezia fil-kampjonat domestiku u għaldaqstant il-moral huwa wieħed għoli wara bidu kemmxejn negattiv.
Huma ma jistgħux jinkludu lill-imweġġgħin Ismael Bennacer, Alessandro Florenzi, Malick Thiaw u Marco Sportiello filwaqt li Alvaro Morata huwa dubjuż.
Harvey Elliot se jkun nieqes għal Liverpool għall- istess raġuni.
Man City v Inter– Dan il-konfront se jlaqqa’ liż-żewġ champions tal-kampjonat domestiku rispettiv meta Manchester City jilqgħu lil Inter.
L-aħħar darba li dawn iż-żewġ timijiet lagħbu kontra xulxin kienet fil-finali tal-2023 hekk kif l-Ingliżi kienu ħarġu rebbieħa bl-iskor ta’ 1-0, bl-uniku goal jiġi skorjat minn Rodri … biex f’dak l-istaġun is-Citizens kienu rebħu t-Treble.
It-team immexxi minn Pep Guardiola jinsab fil-quċċata tal-Premier League Ingliż b’punti massimi minn erba’ partiti filwaqt li dak immexxi minn Simone Inzaghi ġej minn draw diżappuntanti ta’ 1-1 kontra Monza biex ċeda l-ewwel post tal-klassifika lil Napoli.
In-Nerazzurri jridu jagħrfu kif se jrażżnu lill-attakkant Norveġiż, Erling Haaland – ‘annimal uman’ li ħadd ma jista’ jwaqqfu hekk kif mill-bidu tal-istaġun s’issa skorja disa’ goals.
Manchester City għandhom barra lil Nathan Ake, Phil Foden u Oscar Bobb filwaqt li Inter ma jistgħux jilagħbu lil Tajon Buchanan.
Juventus v PSV – Juventus jirritornaw f’din il-kompetizzjoni wara li fl-istaġun li għadda naqsu milli jikkwalifikaw biex temmew 11-il sena konsekuttivi ta’ parteċipazzjoni.
L-avversarji tagħhom huma PSV Eindhoven, b’dan il-konfront huwa meqjus bħala wieħed delikat għalihom minħabba li t-timijiet Olandiżi huma enigma u mprevidibbli fil-kompetizzjonijiet Ewropej.
PSV Eindhoven huma ċ-champions Olandiżi u għandhom team ferm kompetittiv bil-coach, Peter Bosz, lest jagħti sfida lill-Bianconeri.
Iżda t-team immexxi mill-coach, Thiago Motta, fi tmiem il-ġimgħa li għadda ġie miżmum minn Empoli fi draw ta’ mingħajr goals biex fallew żewġ punti mill-aktar importanti.
Il-partitarji qed jaraw lil Motta bħala l-persuna li jista’ jmexxihom għar-rebħ ta’ din il-kompetizzjoni wara li l-aħħar suċċess kien fl-1996.
Juventus se jkollhom jgħaddu mingħajr is-servizzi ta’ Fabio Miretti, Francisco Conceicao u Arkadiusz Milik filwaqt li Hirving Lozano, Ismail Sarbari u Sergino Dest se jkunu neqsin għal PSV … minħabba li qed jirkupraw minn injury.
Atalanta v Arsenal – Atalanta għandhom test diffiċli fl-ewwel ħarġa tagħhom fil-UEFA Champions League meta jilagħbu kontra Arsenal li ġejjin minn rebħa importanti ta’ 1-0 fuq ir-rivali eterni, Tottenham Hotspur.
It-team immexxi minn Giampiero Gasperini rebaħ il-UEFA Europa League u għalhekk ikkwalifika awtomatikament għal din il-fażi. Il-Bergamaschi ġejjin minn rebħa ta’ 3-2 fuq Fiorentina li mentalment tgħinhom biex jinżlu għal dan il-konfront b’kunfidenza.
Iż-żewġ timijiet għandhom players neqsin – Berat Djimsiti, Gianluca Scamacca u Giorgio Scalvini għal Atalanta u Martin Odegaard, Riccardo Calafiori, Mikel Merino u Gabriel Jesus għal Arsenal.
