Illum u għada jintlagħbu l-kwarti-finali tal-UEFA Champions League

Illum u għada tkompli tintlagħab il-kompetiz­zjoni tal-UFEA Cham­pions League fejn jintlagħab l-ewwel leg tal-kwarti-finali bejn l-aħħar tmien timi­jiet li prattikament huma bilanċjati u m’hemmx xi team partikolari favorit.  

ILLUM

Benfica v Inter 

Benfica jimmiraw li jieħ­du vantaġġ mill-fatt li se jilagħbu l-ewwel leg f’darhom meta jilqgħu lil Inter f’Estadio da Luz. 

Iċ-champions Portu­giżi jridu jpattu għad-diżappunt tat-telfa li sofrew fil-kampjonat kontra r-rivali Porto 2-1 f’logħba li huma kienu qed jirbħu. 

Inter xejn m’huma sejrin tajjeb fil-kampjonat tant li nhar il-Ġimgħa sfaw miżmuma fi draw ta’ 1-1 mit-team modest ta’ Salernitana.

Infatti huma niżlu fil-ħames post tal-klassifika bid-destin tal-coach, Simone Inzaghi, huwa inċert u jista’ jitneħħa fi tmiem l-istaġun. 

Biex waslu s’hawn, Inter għelbu lil Porto b’aggregate ta’ 1-0 filwaqt li Benfica għelbu lil Club Brugge bl-iskor ta’ 7-1. 

Il-Portugiżi ma jistgħux jinkludu lill-imweġġgħin, Alexander Beh, Goncalo Guedes, Mihailo Ristic u Julian Draxler.

Hakan Calhanoglu u Milan Skriniar huma neqsin għal Inter.

MANCHESTER CITY v BAYERN MUNICH 

Dan hu wieħed mill-konfronti l-aktar mistennija li huwa miftuħ għal kull ri­żultat. 

Manchester City jinżlu għal dan il-konfront b’mo­ral għoli hekk kif  reġgħu daħlu biċ-ċans li jirbħu l-kampjonat Ingliż wara li l-leaders Arsenal fallew żewġ punti importanti kontra Liverpool.  

Min-naħa l-oħra, Ba­yern Munich reġgħu ħadu l-kmand tal-klassifika wara n-nofs żelqa li kellhom fil-ġimgħa ta’ qabel kontra Bayer Leverkusen.

F’din il-partita, se jkun hemm dwell interessanti bejn tnejn mill-aqwa skorers fil-kampjonati Ewropej –  Erling Haaland (Manchester City) u Jamal Musiala (Ba­yern Munich).

Biex waslu sa dan l-istadju, is-Citizens għelbu lil RB Leipzig b’aggregate ta’ 7-1 filwaqt li Bayern għelbu lil Paris St-Germain bl-iskor ta’ 3-0. 

Il-coach ta’ Manchester City Pep Guardiola ma jistax jinkludi lil Phil Foden minħabba li qed jirkupra minn operazzjoni. 

Bayern għandhom bosta players li qed jirkupraw minn injury fosthom Paul Wanner, Eric Choupo Moting, Gabriel Marusic, Mat­hys Tel, Manuel Neuer u Lucas Hernandez. 

GĦADA

REAL MADRID v CHELSEA

Iċ-champions renjanti, Real Madrid, jilqgħu lil Chelsea f’dik li hija meqjusa bħala partita delikata. 

Jekk kulħadd huwa konxju tal-qawwa tagħhom, bħalissa ma tantx sejrin taj­jeb fil-kampjonat domestiku hekk kif ġejjin minn telfa f’darhom bl-iskor ta’ 3-2 kontra Villarreal biex id-distakk tagħhom mil-leaders, Barcelona, huwa dak ta’ 12-il punt, bil-Katalani rkupraw il-partita tard il-bie­raħ filgħaxija liema vantaġġ seta’ kiber. 

Min-naħa tal-Pensi­ners, din il-kompetizzjo­ni tista’ ssalvalhom l-istaġun min­ħabba li huma maqtugħin milli jikkwalifikaw għall- istess kompetizzjoni fl-ista­ġun li ġej. 

Huma se jkunu mmexxija mill-coach Frank Lampard wara li fi ftit xhur tkeċċew lil Thomas Tuchel (li ngħaqad ma’ Bayern Munich) u lil Graham Potter. 

Iżda Lampard ma tantx kellu debutt feliċi minħabba li nhar is-Sibt sfaw megħluba minn Wolves bl-iskor ta’ 1-0. 

Biex waslu s’hawn, Real Madrid eliminaw lil Liverpool b’aggregate ta’ 6-2 filwaqt li Chelsea eliminaw lil Borussia Dortmund 2-1.

Real Madrid għandhom biss lil Ferland Mendy nie­qes filwaqt li l-Blues ma jistgħux jinkludu lil Mason Mount, Thiago Silva u Cezar Aspilicueta.

MILAN v NAPOLI

Milan jospitaw lil Napoli f’dak li huma meqjus bħala d-derby tal-Italja. 

Dan huwa dwell bejn iċ-champions preżenti u ċ-champions li jmiss hekk kif Napoli huma kważi ċerti mir-rebħ tat-titlu wara 35 sena.  

Bħalissa, filwaqt li Milan jinsabu fir-raba’ post tal-klassifika, il-leaders Napoli qed igawdu vantaġġ ta’ 16 il-punt fil-quċċata. 

Ir-Rossoneri ġejjin minn draw ta’ 0-0 kontra Empoli filwaqt li l-Partenopei ġejjin minn rebħa ta’ 2-1 fuq Lecce. 

Iżda l-Milanisti jittamaw li jkollhom l-istess prestaz­zjoni ta’ ġimagħtejn ilu meta marru għand Napoli u rebħulhom bl-iskor ta’ 4-0.

Peró huma jridu jagħrfu kif se jrażżnu lill-koppja, Victor Osimhen u Khvicha Kvaratskhelia, li litteralment qed iwerwru lid-difiżi avversarji bil-kapaċitajiet tagħhom. 

Ir-Rossoneri kkwalifikaw mal-aħħar tmienja wara li eliminaw lil Tottenham Hotspur b’aggregate ta’ 1-0 filwaqt li Napoli għelbu lil Eintracht Frankfurt bl-iskor ta’ 5-0. 

Milan se jkollhom jgħaddu mingħajr is-servizzi tal-­imweġġgħin, Zlatan Ib­ra­himovic u Pierre Kalulu, filwaqt li Osimhen se jagħmel test aħħar biex jiġi dikjarat f’sikktu.