Minn Cristian Muscat
Kif għażilt l-atletika fost minjiera ta’ sports ieħor?
Jien diġá kelli l-passatemp tal-għawm bil-ħarpun is-sena kollha imma dejjem kienet ix-xewqa tiegħi li nibda niġri imma qat ma kelli opputurtunitá li nibda xi ħaġa li dejjem xtaqt.
Ta’ kemm bdejt tipprattika l-atletika?
Bdejt tal-etá ta’ 58 sena u sitt xhur.
X’ħeġġek l-iktar biex tibda tipprattika dan l-isport? Min kien dak il-persuna li ispirak biex tagħżel l-atletika?
Kont waqt ġbid ta’ film bħala extra meta ġejt imqabbda niġri biex nagħmel il- parti tiegħi. Hemm iltqajt ma’ persuna li kienet kowċ u minn hemm, jien bdejt ma’ St Patrick’s Athletic Club #spacmalta.
Liema unuri prinċipali irnexxielek tikseb fil-karriera tiegħek?
Kienet l-ewwel tellieqa wara tliet xhur li bdejt meta ġejt l-ewwel fil-kategorija tiegħi li kienet tal-klabb u minn hemm qatt ma ħarist lura u l-iktar kif għalaqt 60 sena ridt nagħti rigal lili nnifsi li nagħmel 42 kilometru u rnexxieli. Fl-2024, għamilt it-tellieqa ta’ Caritas Malta, fejn ġejt l-ewwel u għamilt personal best.
Liema kien l-aħjar riżultat tiegħek sa issa?
Kull tellieqa hija differenti u ftit li kienu li għamilt l-istess waħda bħala rotta, iżda l-aħjar kienet il-21 kilometru meta sifirt Madrid fejn qatt qabel ma kont irkibt l-ajruplan u sħabi tal-klabb għamluli ħafna kuraġġ biex immur. Ftit tax-xhur ilu għamilt 21k f’Ċipru fejn kont ġejt it-tieni fil-kategorija tieghi u fid-19 ta’ Ottubru għamilt il-5k tal-Maqluba fil-Qrendi fejn għamilt l-aħjar ħin tiegħi u ġejt -ewwel fil-kategorija tiegħi biex ksibt is-37 trofew fil-karriera tiegħi.
Għandek xi ħolma li tixtieq tikseb fl-atletika?
Jekk Alla jrid li nibqa’ b’saħħti biex nibqa’ niġri u nieħu sehem f’iktar tiġrijiet.
X’sagrifiċċji / commitments jitlob l-isport li int tipprattikka?
Trid il-ħin kważi ta’ kuljum biex tibqa’ tiġri. Għalhekk trid tagħmel sagrifiċċju li tnaqqas xi ħaġ’oħra biex tlaħħaq mat-taħriġ differenti li jkolli tul il ġimgħa speċjalment meta tasal xi tiġrija. Ikolli nnaqqas mill-baħar peressli ninżel is-sena kollha nogħdos.
Għalkemm l-atleti li tikkompeti magħhom huma wkoll ħbieb tiegħek, ninsab persważ li jidħol ukoll ċertu sens ta’ kompetizzjoni fejn wieħed ikun irid jikseb ħin aħjar mill-ieħor. Il-kummenti tiegħek.
Kull persuna tkun ix-xewqa tagħha li tagħmel ħin tajjeb mal-istess kategorija tagħha, imma dejjem trid iżżom f’moħħok kemm tiflaħ u mhux iżjed. Iżda kull tip ta’ sport issib kompetizzjoni li xi drabi nara li ma jibqax sens ta’ ħbiberija u tinbidel f’mibegħda u b’dispjaċir ngħid li din saret lili personali.
X’kompetizzjonijiet prinċipali se tieħu sehem fihom fil-futur qrib?
Fi Frar li ġej nixtieq li nerġa’ nagħti rigal lili nnifsi meta nagħlaq 63 sena li nagħmel 42k fil-Maratona ta’ Malta.
Għaddi messaġġ lil dawk it-tfal u / jew żgħażagħ li qegħdin jaħsbuha bis-serjetà li jibdew jipprattikaw l-atletika.
Għalkemm bdejt kbira niġri imma qatt mhu tard la saħħtek tagħtik, tiha x’tagħmel! Dejjem hemm il-bidu u mhux bilfors f’etá żgħira, iżda li tagħmel xi tip ta’ sport se jgħinek mentalment u fiżikament u tħoss sodisfazzjon personali. Dawk li jaħsbu li mhux tajbin għal xi sport, xorta għandhom jippruvaw għax jekk tixtieq xi ħaġa, bid-determinazzjoni, tasal fejn trid! Jien ilni armla 11-il sena u l-atletika għenitni nibqa’ soda u nkun kapaċi nikkumbatti mal-ħajja!