L-avukati tal-attakkant ta’ Aston Villa u l-Italja, Nicolò Zaniolo, jinsistu li “qatt ma għamel imħatri” fuq il-football iżda lagħab biss poker u blackjack online u għalhekk jekk dan jiġi konfermat ma jiffaċċjax sospensjoni.
Filwaqt li l-midfielder ta’ Juventus, Nicolò Fagioli, u anke l-istilla ta’ Newcastle United, Sandro Tonali, allegatament stqarrew li ħallew il-logħob tal-azzard u l-imħatri fuq logħbiet tal-football jaħarbu minn taħt idejhom, Zaniolo għandu approċċ differenti biex jiġi nvestigat għall-iskandlu tal-imħatri.
“Nicolò qatt ma għamel imħatri, huwa assigurani minn dan,” qal l-Avukat Gianluca Tognozzi lill-ġurnal sportiv Taljan.
“Huwa possibbli li kien qed jilgħab logħob tal-karti bħall-poker u l-blackjack fuq pjattaformi llegali online, iżda mingħajr ma kien jaf li kienu llegali.
“Se niċċaraw kollox”.
Il-players professjonali huma teknikament ipprojbiti minn kwalunkwe forma ta’ logħob tal-azzard, iżda jekk Zaniolo ma lagħabx fuq il-football jew xi sport ieħor, allura l-pożizzjoni tiegħu tkun differenti ħafna mill-perspettiva tal-ġustizzja legali u sportiva.
“Huwa jirriskja ftit mijiet ta’ ewros f’multi, sakemm ovvjament ma jagħmilx hekk ta’ spiss li jiġġustifika aktar kastig, iżda anke f’dak il-każ, ikun minimu.”
Din hija ċertament verżjoni differenti minn dik li ħarġet fl-aħħar jiem, li skontha Zaniolo kien jiffaċċja sanzjonijiet aktar ħorox minn sħabu għax kien ikollu rwol fit-tixrid u l-organizzazzjoni taċ-ċirku tal-imħatri llegali li jinvolvi lill-kollegi tiegħu.
Il-ġurnalist magħruf tax-xnigħat ta’ dawn il-każijiet, Fabrizio Corona, sostna wkoll li omm Zaniolo kellha rwol fil-logħob tal-azzard.
