Missier il-midfielder ta’ Juventus, Nicolò Fagioli, Marco, saħaq li l-aġenti għandhom jagħmlu aktar biex jgħinu lill-players tagħhom jifhmu l-impenji u l-obbligi kuntrattwali tagħhom wara li ħarġet l-aħbar li ibnu huwa nvolut fl-iskandlu tal-imħatri tal-football li qed jikber fil-football Taljan.
Fagioli kien l-ewwel player imsemmi minn Corona, bħala mħatri fuq pjattaformi llegali online, li minn dak iż-żmien ‘il hawn ammetta, għalkemm jinsisti li ma lagħabx fuq logħbiet li jinvolvu l-club attwali jew ta’ qabel tiegħu.
Dan l-aħħar Marco Fagioli ta intervista lil ġurnal influwenti Taljan, fejn spjega li l-aġenti għandhom jagħmlu aktar biex jgħinu lill-klijenti tagħhom jekk iridu jiġġustifikaw is-salarji li jaqilgħu.
Meta kien qed jitkellem speċifikament dwar ibnu, Fagioli ma riedx jidħol wisq fid-dettall. “Ma jien se ngħid xejn dwar dak li kellu jagħmel ibni, issa mhux iż-żmien. Ħafna minn dak li qrajt dwaru mhux minnu, iżda jekk ippruvajt nispjegah, ħadd ma kien jismagħni bħalissa.
“Xi ħaġa dejqitu, iżda ma kontx nimmaġina li se tiġri xi ħaġa bħal din. Aħna qrib ta’ binna, kif dejjem konna”.
Fagioli mbagħad spjega li l-players għandhom bżonn aktar għajnuna biex jifhmu l-impenji tagħhom barra l-ground.
“Il-clubs u l-ġenituri ma jistgħux dejjem joqogħdu wara l-players 100%, ikun utli li l-aġenti jwissuhom, isegwuhom u jagħtuhom pariri.
“Għandhom jgħinuhom jifhmu x’impenji jieħdu meta jiffirmaw kuntratt. B’hekk ikunu qed jiġġustifikaw il-flus li jaqilgħu”.
