Il-Ministru tal-Edukazzjoni u Sport, Clifton Grima, u l-president tal-MFA, Bjorn Vassallo, nedew inizjattiva ġdida bl-isem ta’ “Fun Fit Football”. Dan il-programm ġdid se jkun mifrux madwar l-iskejjel tal-Gvern kollha f’Malta u Għawdex u hu wieħed mill-inizjattivi l-ġodda li ħadet f’idejha l-Fondazzjoni “Inħobb il-Futbol”.
It-tnedija ta’ dan il-programm sar fl-iskola primarja ta’ Ħal Lija fejn fil-preżenza tat-tfal u l-għalliema ngħataw l-aħħar dettalji dwar il-pjan ‘il quddiem li qed tħejji din il-fundazzjoni.
Tkellem il-president tal-MFA, Bjorn Vassallo, li semma’ kemm din il-ġurnata tista’ titqies bħala waħda sabiħa minħabba li l-assoċjazzjoni qed twettaq waħda mill-viżjonijiet tagħha fejn għandu x’jaqsam il-grassroots u kemm hu importanti li l-isport jitgawda minn kulħadd.
“Nafu kemm f’Malta hawn problema ta’ obeżitá, ħafna jgħixu ħajja sedentarja u ċertament li din mhux sitwazzjoni ideali. Minkejja kollox, qed noffru dan il-programm għat-tfal kollha li jinsabu fl-iskejjel primarji fil-Gżejjer Maltin.”
Is-Sur Vassallo jittama li dan il-programm jgħin lit-tfal sabiex iwittilhom it-triq lejn bidu ta’ ħajja sportiva li hi essenzjali sabiex ikollna futur b’ċittadini aktar b’saħħithom.
Huwa faħħar il-Fondazzjoni “Inħobb il-Futbol” li qed tagħmel biċċa xogħol kbira u qed tgħin sabiex ixxettel l-imħabba lejn l-isport partikolarmnet il-football.
“Din il-fondazzjoni qed tkun xprun lejn ħajja aktar sportiva għat-tfal u ż-żgħażagħ tagħna li qed jitħarrġu f’infrastruttura ta’ livell bit-tama li tkompli titgawda aktar fis-snin li ġejjin.”
Tkellem ukoll il-Ministru għall-Edukazzjoni u l-isport, Clifton Grima, li faħħar din l-inizjattiva tal-Assoċjazzjoni Maltija tal-Football.
“L-MFA kienet ferm pro-attiva f’din id-deċiżjoni li ħadet u se tgħin sabiex naraw aktar tfal jaqbdu sport partikolari. Minn hawn nixtieq inħeġġeġ aktar assoċjazzjonijiet sabiex jersqu ‘l quddiem filwaqt li jaħdmu id f’id mal-gvern u eventwalment noħolqu programmi simili.”
“Biex it-tfal ikollhom edukazzjoni sħiħa apparti l-parti akkademika li hi ferm importanti, tidħol ukoll il-fażi sportiva li apparti li tagħti opportunitajiet kbar fost lill-istudenti, fl-istess waqt tgħinhom anke jkunu ferm aħjar fiżikament. Għalhekk din il-kollaborazzjoni bejn l-MFA u l-Gvern ċentrali se tgħin sabiex aktar tfal jipparteċipaw f’attivitajiet sportivi u aħna bħala ministeru ninkoraġixxu dawn il-programmi.”
L-Onorevoli Grima temm jgħid li bi programmi bħal dawn it-tfal se jkollhom benefiċċju kbir li jgħin ukoll sabiex tinżera l-kultura sportiva li f’dawn l-aħħar snin qed tiżdied għalkemm fadal ħafna xi jsir.
Finalment ingħataw dettalji oħra dwar din l-inizjattiva li qed tinfirex madwar l-iskejjel f’Malta u Għawdex mat-tfal bejn l-ewwel u s-sitt sena tal-primarja. Mill-ewwel mumenti ta’ dan il-programm jingħad li t-tfal qed juru entużjażmu kbir u qed jistennew ferm dawn is-sessjonijiet li jagħtuhom ftit ċans jipprattikaw l-isport li tant iħobbu.
