Il-konsultazzjoni pubblika għall-Politika Nazzjonali dwar iż-Żgħażagħ, li tnediet mis-Segretarju Parlamentari għaż-Żgħażagħ, l-Isport u l-Volontarjat Clifton Grima, hija politika bbażata u mibnija fuq is-suċċessi miksubin fl-aħħar ħames snin, filwaqt li tiffoka fuq l-isfidi u l-opportunitajiet li ġejjin.
Il-Politika Nazzjonali dwar iż-Żgħażagħ 2021-2030 bl-isem Towards 2030 – Reaching out to, working with, and supporting young people se tkopri l-perjodu bejn l-2021 sa l-2030 u tiffoka fuq iż-żgħażagħ kollha ta’ bejn it-13 u t-30 sena.
Is-Segretarju Parlamentari Clifton Grima qal li permezz tal-Politika Nazzjonali taż-Żgħażagħ fl-2015, kienet ġiet stabbilita politika nazzjonali realistika u fattibbli. Is-suċċess f’dan is settur huwa xhieda tal-impenn u dedikazzjoni tal-Gvern lejn iż-żgħażagħ. Din il-politika pprovdiet pedamenti sodi għall ħidma li qed issir illum għall-iżvilupp ta’ politika nazzjonali ġdida dwar iż-żgħażagħ.
“Aħna fiduċjużi li meta naħdmu flimkien fi spirtu ta’ kooperazzjoni u appoġġ reċiproku, biż żgħażagħ jingħataw r-rwol ċentrali u ta’ protagonsiti, nistgħu ndawru kwalunkwe sfida f’opportunità sabiex niżguraw żvilupp sħiħ tal-persuna”, temm jgħid is-segretarju parlamentari.
Towards 2030 hija inkorporata f’politiki nazzjonali relatati kif ukoll fil-politiki taż-żgħażagħ Ewropej u internazzjonali u se tikkumplimenta l-politiki nazzjonali f’oqsma relatati bħall-edukazzjoni, l impjieg, il-ġustizzja u s-saħħa – oqsma li lkoll għandhom impatt fuq iż-żgħażagħ.
Il-viżjoni ta’ din il-politika se tkun:
• Flessibbilità u innovazzjoni—li tvarja minn dak lokali għal dak nazzjonali u minn dak nazzjonali għal dak Ewropew u dak globali.
• Għandha l-għan li tappoġġja u tħeġġeġ liż-żgħażagħ, kemm bħala individwi kif ukoll bħala ċittadini, fi skejjel u istituzzjonijiet edukattivi, fix-xogħol, fil-komunità u permezz tal-midja soċjali.
• Li tagħti s-setgħa liż-żgħażagħ permezz tal-prattika effettiva tal-youth work, inkluża d diġitalizzazzjoni tax-xogħol taż-żgħażagħ; ċentri u appoġġ reġjonali u lokali bbażati lokalment; programmi nazzjonali, proġetti u inizjattivi transsettorjali mas-setturi volontarji, statali u privati; u xogħol miż-żgħażagħ għaż-żgħażagħ.
Din il-politika tistabbilixxi sitt għanijiet strateġiċi u azzjonijiet li se jiġu implimentati matul il perjodu 2021-2030.
Ir-responsabbiltà ġenerali għall-implimentazzjoni ta’ din il-politika se tkun tal-Ministeru għall Edukazzjoni u x-Xogħol u tas-Segretarjat Parlamentari għall-Isport, iż-Żgħażagħ u l-Volontarjat, filwaqt li Aġenzija Żgħażagħ se tkun responsabbli għall-ippjanar strateġiku, l-implimentazzjoni u kwistjonijiet operattivi ta’ kuljum. Il-Kunsill Nazzjonali taz-Żgħażagħ ukoll se jsegwi din il-politika.
Dan id-Dokument ta’ Diskussjoni jara li jiżgura li dawk in-nies, gruppi u organizzazzjonijiet kollha li jaħdmu għal, u maż-żgħażagħ, ikollhom l-opportunità li jipparteċipaw b’mod attiv u jikkontribwixxu għall-iżvilupp u l-implimentazzjoni tiegħu.
Il-konstulazzjoni pubblika hija miftuħa sat-30 ta’ Ottubru 2020 u l-pubbliku jista’ jibgħat is suġġerimenti tiegħu permezz ta’ email fuq: [email protected].
Id-dokument tal-konsultazzjoni pubblika għall-Politika Nazzjonali dwar iż-Żgħażagħ 2021-2030 jinsab fuq is-sit: https://online.fliphtml5.com/rqmms/hhjn/.
