Is-Segretarju Parlamentari għaż-Żgħażagħ, ir-Riċerka u l-Innovazzjoni Keith Azzopardi Tanti nieda l-Programm għal din is-sena ta’ Esplora, iċ-Ċentru Interattiv tax-Xjenza. Dan il-programm komprensiv mhux biss jiċċelebra l-għaxar snin mit-twaqqif taċ-ċentru, iżda jippreżenta viżjoni ambizzjuża li ssaħħaħ l-edukazzjoni STEAM, iżid l-għarfien dwar il-bijodiversità u t-tagħlim inklużiv fis-soċjetà Maltija.
Is-Segretarju Parlamentari Keith Azzopardi Tanti saħaq fuq l-irwol fundamentali ta’ Esplora fl-iżvilupp tal-ħiliet futuri. Huwa enfasizza li, “L-edukazzjoni hija l-aqwa investiment li nistgħu nagħmlu fit-tfal u ż-żgħażagħ tagħna, sabiex jaħtfu l-aqwa opportunitajiet li qed toħloq l-ekonomija tagħna. L-Esplora għandu rwol importanti biex jgħin liż-żgħażagħ jifhmu kif ir-riċerka u l-innovazzjoni jsawru d-dinja. Inizjattivi li huma parti minn dan il-Programm irawmu ħiliet bikrija fil-ħsieb kritiku, l-esperimentazzjoni u problem solving li huma essenzjali għall-forza tax-xogħol futura u l-ekosistema tar-riċerka ta’ Malta.”
Il-Programm jintroduċi ħames esibizzjonijiet immersivi ġodda: Science on a Sphere, Magna Rube Goldberg, Funtana tal-Arja, kolonja tan-naħal ħajja li tiffoka fuq il-bijodiversità, u l-gallerija interattiva Musicon. Dawn l-esibizzjonijiet huma mfassla biex jagħmlu kunċetti xjentifiċi kumplessi aktar aċċessibbli għall-pubbliku permezz ta’ esperjenzi prattiċi u kreattivi. Barra minn hekk, Esplora se jkun qed imexxi l-iżvilupp tal-ewwel Strateġija Nazzjonali STEAM għal Malta, bl-appoġġ ta’ Taskforce nazzjonali ġdida.
Is-Senior Director ta’ Esplora, Mary Ann Cauchi, spjegat li l-programm jirrifletti l-evoluzzjoni taċ-ċentru lejn l-interdixxiplinarjetà. “Il-Programm 2026 jirrifletti l-evoluzzjoni ta’ Esplora minn STEM għal STEAM, fejn ix-xjenza u t-teknoloġija huma msaħħa permezz tal-kreattività, id-disinn u r-rakkontar tal-istejjer. Billi ninkorporaw ħiliet trasversali, qed nippermettu lil studenti ta’ kull età jaħsbu b’mod kritiku u jikkollaboraw b’mod effettiv.”
Inizjattiva sinifikanti oħra fi ħdan dan il-programm hija t-tnedija ta’ proġett nazzjonali ta’ riċerka għal żgħażagħ bejn it-13 u s-17-il sena, li se joffri finanzjament u mentorship f’proġetti ssorveljati. Fl-istess waqt, Esplora se jkompli jinvesti fl-inklużjoni permezz ta’ inizjattivi multisensorjali u sessjonijiet imfassla għall-bżonnijiet ta’ viżitaturi newrodiversi, biex b’hekk iċ-ċentru jkun verament miftuħ għal kulħadd.
Matul is-sena, il-pubbliku se jkun jista’ jibbenefika minn kalendarju mimli attivitajiet, inklużi Open Days kull xahar, is-sessjonijiet XjenzaAnzjan, u programmi edukattivi speċjalizzati għall-iskejjel. B’dan il-programm, Esplora qed iħares lejn id-deċennju li ġej b’direzzjoni ċara li tpoġġi s-sostenibbiltà u l-edukazzjoni xjentifika fil-qalba tal-komunità.
Hekk kif l-Esplora qiegħed ifakkar għaxar snin mill-ftuħ tiegħu, is-sena tal-anniversarju mhijiex ċelebrazzjoni retrospettiva, iżda qed isservi ta’ pjattaforma għat-tiġdid u ambizzjoni, b’tisħiħ fl-irwol taċ-Ċentru fil-promozzjoni ta’ STEAM, il-bijodiversità u t-tagħlim inklużiv, filwaqt li jistabbilixxi direzzjoni ċara għad-deċennju li ġej.
Għal aktar informazzjoni, wieħed jista’ jżur is-sit www.esplora.org.mt.
