Fil-Jum Dinji għall-Mard tal-Kanċer bit-tema ‘United by Unique. Putting people at the centre of care’, il-Ministru għas-Saħħa u l-Anzjanità Attiva Jo Etienne Abela ħabbar li wara li ġie mwettaq proġett pilota, ġie mniedi servizz ta’ outreach tal-onkoloġija fil-komunità.
Il-Ministru Jo Etienne Abela spjega li s-servizz ta’ outreach tal-onkoloġija jipprovdi benefiċċji sinifikanti lill-pazjenti billi jagħti kura essenzjali relatata mal-kanċer direttament fil-komunità. Is-servizz beda bħala proġett pilota b’infermiera waħda fejn temmejna s-sena 2025 b’425 sessjoni mwettqa b’suċċess.
It-tim issa jikkonsisti fi tliet infermiera full-time, żewġ sewwieqa u żewġ vannijiet bit-tagħmir kollu meħtieġ, li se jippermetti li jitwettqu aktar sessjonijiet, b’40 sessjoni diġà tlestew sal-aħħar ta’ Jannar.
Il-Ministru Jo Etienne Abela qal kif dan is-servizz jiżgura kura aktar aċċessibbli għal dawk li ma jistgħux jivvjaġġaw faċilment. “Fi snin li ġejjin il-ġlieda kontra l-kanċer ser tkompli tkun ibbażata fuq il-prevenzjoni u l-iscreening u l-Gvern ser jibqa’ kommess li jkompli jinvesti f’dan is-settur tant vitali,” temm jgħid Dr Abela.