Hekk kif il-football fuq bażi ta’ club wasal fi tmiemu għal dan l-istaġun attwali 2021/22, se tibda tieqa internazzjonali matul l-ewwel nofs ta’ Ġunju, u uffiċjali Maltin se jkunu wkoll impenjati f’dak li għandu x’jaqsam ma’ logħbiet uffiċċjali madwar l-Ewropa.
‘Double header’ qed jistenna lir-referee tal-FIFA Ishmael Barbara li flimkien mat-team ta’ uffiċjali tiegħu ġie fdat biex imexxi l-partita ta’ Grupp D tal-Kampjonat Ewropew tal-UEFA U21 bejn l-Iżlanda u Liechtenstein.
Għall-partita skedata għal nhar il-Ġimgħa 3 ta’ Ġunju f’Víkingsvöllur, fl-Iżlanda, Ishmael se jkun assistit mit-team tiegħu li jinkludi lil Roberto Vella u Duncan Sultana bħala l-Assistenti tiegħu, filwaqt li Malcolm Spiteri ġie inkarigat bħala r-Raba’ Uffiċjal.
L-istess formazzjoni ta’ uffiċjali għat-tieni partita hija assenjata lir-referee tal-FIFA Ishmael Barbara, li se jkollu jivvjaġġa mill-Iżlanda lejn il-Katalunja biex imexxi l-partita internazzjonali ta’ ħbiberija ta’ profil għoli bejn il-Perù u New Zealand.
Din il-partita internazzjonali ta’ ħbiberija bejn timijiet minn kontinenti differenti ‘l bogħod hija skedata għall-Ħadd 5 ta’ Ġunju fl-RCDE Stadium f’Barcelona.
Għal darb’oħra Roberto Vella u Duncan Sultana se jkunu qed jingħaqdu ma’ Ishmael bħala l-Assistenti Referees tiegħu, b’Malcolm Spiteri assenjat bir-rwol ta’ Raba’ Uffiċjal.
Minbarra d-double header għal Ishmael Barbara, fi tmiem il-ġimgħa li ġej, ġie assenjat ukoll referee ieħor tal-FIFA Trustin Farrugia Cann b’appointment sinjifikanti, li jikkontrolla l-logħba tal-UEFA Nations League 2023 – League C bejn it-Turkija u l-Gżejjer Faroe.
Il-partita skedata għas-Sibt 4 ta’ Ġunju tintlagħab fil-Başakşehir Fatih Terim Stadium f’Istanbul, b’Luke Portelli u Edward Spiteri inkarigati bir-rwol li jkunu ż-żewġ assistenti referees tiegħu, fejn Matthew Degabriele se jkun qed jingħaqad mat-team bħala r-Raba’ Uffiċjal għal din il-partita fit-Turkija.
F’din il-partita ta’ min isemmi wkoll il-fatt li dan il-konfront bejn it-Turkija u l-Gżejjer Faroe huwa l-ewwel partita li qatt kellha l-uffiċjali tal-partita lokali biex jamministraw is-sistema VAR.
Fil-fatt, ir-rappreżentanti tal-FIGC (Federazzjoni Taljana tal-football) Daniele Doveri u Rosario Abisso se jkunu fil-kamra tal-VAR jassistu lill-erba’ referees Maltin li kif spjegat qabel se jkunu mmexxija minn Farrugia Cann biex jikkontrolla din il-partita.
Fl-aħħarnett, ġej appointment internazzjonali ieħor għall-uffiċjali Maltin, din id-darba fil-Beach Soccer bir-Referee femminili tal-FIFA Stefania Bonnici ssir l-ewwel Referee mara Maltija tal-FIFA Beach Soccer maħtura biex tmexxi l-Beach Soccer Worldwide Euro Winners’ Cup Tournament 2022.
Dan huwa skedat bejn din il-Ġimgħa 3 u l-Erbgħa 8 ta’ Ġunju, b’Bonnici se tivvjaġġa lejn Nazare’ fil-Portugall fejn se jkun qed isir dan l-avveniment prominenti.
