Kap tal-Mafja li qatta’ għexieren ta’ snin jaħrab l-infurzar tal-liġi sa qabel ma ġie arrestat f’Jannar li għadda, miet waqt li kien qed jingħata kura medika. Il-kap mafjuż, Matteo Messina Denaro miet fl-isptar San Salvatore f’Aquila, fiċ-ċentru tal-Italja, fejn kien qed jieħu trattament għall-kanċer.
Qabel l-arrest tiegħu fi klinika privata f’Palermo f’Jannar li għadda, l-eks kap tal-Mafja kien ilu maħrub mill-1993. Huwa kien meqjus mill-Europol bħala wieħed mill-aktar persuni mfittxija fl-Ewropa. Dan kien stqarru l-prosekutur Maurizio de Lucia lil midja internazzjonali.
Messina Denaro ingħata diversi sentenzi ta’ ħabs, l-aktar fl-1992 għall-involviment tiegħu fil-qtil tal-prosekuturi kontra l-Mafja Giovanni Falcone u Paolo Borsellino. Huwa kien ingħata l-ikbar sentenza ta’ għomor ħabs fl-2020 minħabba l-bumbardamenti fatali f’Milan, Firenze u Ruma lejn l-aħħar tad-disgħinijiet u għall-qtil ta’ tifel ta’ 11-il sena.
Messina Denaro kien magħruf bħala Diabolik u kien wieħed mis-suċċessuri ta’ Bernardo Provenzano, li kien arrestat waqt li kien moħbi f’razzet barra Corleone, Sqallija, f’April tal-2006. Il-kriminalità kienet affari tal-familja għal Messina Denaro.
Fost dawk arrestati fir-repressjoni tal-2009-2010 kien hemm ħuh, Salvatore. Fl-2013, oħtu, Patrizia Messina Denaro, ġiet ikkundannata 14-il sena ħabs, terminu li għadha qed tiskonta, talli kienet membru tal-Mafja.
