Għadha kemm tħabbret il-mewt tal-Eks Prim Ministru Taljan, Silvio Berlusconi, fl-età ta’ 86 sena.
L-aħbar uffiċjali ngħatat dalgħodu mill-isptar San Raffaele, fejn kien qed jirċievi trattament għal dawn l-aħħar erbat ijiem.
Berlusconi, apparti li mexxa tliet gvernijiet Taljani fis-snin bejn l-1994 u l-2011, huwa wkoll Eks President ta’ Milan. Huwa ħa f’idejh lill-club ta’ Milan fi Frar tal-1986, fejn kiseb bosta suċċessi fl-istorja tal-futbol Taljan: salva lir-Rossoneri minn falliment biex eventwalment rebaħ tmien titli tas-Serie A, ħames kampanji ta’ suċċess fit-Tazza Ewropea u taċ-Champions League, darba l-Coppa Italia u seba’ darbiet is-Super Cup.
Berlusconi kien diġà ddaħħal l-isptar f’diversi okkażjonijiet din is-sena, l-aktar li qatta’ ftit jiem fil-kura intensiva bi pnewmonja maħsuba li kienet riżultat tal-lewkimja tiegħu fil-bidu ta’ Mejju. Aktar tard ġie żvelat li Berlusconi kien ġie djanjostikat bil-lewkimja f’April u li kien diġà beda l-kimoterapija. Berlusconi qabel dan kollu kien għadda minn operazzjoni tal-qalb fl-2016.
Minkejja li baqa’ President tal-Partit Forza Italia, Berlusconi rari deher fil-pubbliku fix-xhur li għaddew, u dan fost tħassib dwar saħħtu.
