Fi stqarrija maħruġa l-Pulizija kkonfermat li fl-aħħar sigħat sfortunatament tilef ħajtu raġel li kien ilu xi jiem fil-periklu tal-mewt wara li kien involut f’inċident tat-traffiku fix-Xewkija.
Ir-raġel kien iddaħħal l-isptar fis-17 ta’ Mejju li għadda wara li għall-ħabta tal-9:40 a.m kien involut f’inċident tat-traffiku li seħħ fi Triq it-Tessuti, ix-Xewkija.
Minn stħarriġ illi sar irriżulta li kienet seħħet ħabta bejn mutur Yamaha 250, misjuq minn raġel ta’ 63 sena residenti x-Xagħra u vettura Mistubishi Pajero misjuqa minn raġel ta’ 66 sena residenti s-Sannat.
Tim mediku ta l-assistenza tiegħu lis-sewwieq tal-mutur sakemm seta’ jittieħed l-Isptar Ġenerali t’Għadewx għal aktar kura permezz ta’ ambulanza li ssejħet fil-post. Iżjed tard huwa ġie iċċertifikat li qiegħed isofri minn ġrieħi serji.
Bil-każ ġiet infurmata l-Maġistrat tal-Għassa Dr Simone Grech, li ordnat li ssir inkjesta u ħatret diversi esperti sabiex jassistu.
