Il-festa ta’ solidarjetà ta’ L-ISTRINA tfakkarna fit-tbatijiet ta’ bosta persuni u naraw ħafna appelli li għalkemm huma importanti biex nifhmu aħjar dawn it-tbatijiet, bħal isewdulna qalbna.
Iżda fost dawn il-ħafna appelli aktar kmieni waqt l-attività f’Ħal Kirkop mar jimla l-post bit-tbissima tiegħu ċ-ċkejken Lydon flimkien ma’ missieru.
“In-nies għandhom iċemplu u jgħinu lil kull min għandu bżonn. It-tfal kollha li huma morda għandhom jibqgħu jagħmlu kuraġġ lejn żmien aħjar”, appella ċ-ċkejken.
Intant missieru qal li l-ammont miġbur f’perjodu ta’ ftit sigħat jikkonferma kemm Malta kollha tinsab wara dawn in-nies fil-bżonn u b’hekk għandhom jimtlew bil-kuraġġ kontra l-mard tagħhom.
Il-missier u ibnu kantaw kanzunetta b’messaġġ sabiħ għal dawn iż-żminijiet fejn jappellaw biex ħadd ma jitħalla waħdu. Fost persuni li jissemmew fil-kanzunetta hemm il-priġunieri u l-anzjani.
