Klinika ġdida privata tal-fertilità – HOPE Clinic – li qed toffri servizzi ta’ prokreazzjoni assistita lill-klijenti Maltin u barranin ġiet inawgurata mid-Deputat Prim Ministru u Ministru għas-Saħħa Chris Fearne u l-Ministru għall-Ambjent, l-Enerġija u l-Intrapriża Miriam Dalli.
Id-Deputat Prim Ministru stqarr li Malta diġà toffri servizz tal-ogħla livell, bla ħlas lill-Maltin permezz tal-ART Clinic ġewwa l-isptar Mater Dei, u għalhekk din il-klinika privata tista’ tikkumplimenta s-servizz eżistenti u tkompli ssaħħaħ isem pajjiżna f’dan il-qasam fuq livell internazzjonali. Huwa ħabbar li minn kemm ilha li bdiet tinġabar l-istatistika mill-Awtorità Maltija għall-Protezzjoni tal-Embrijuni, sa issa twieldu 434 tarbija f’pajjiżna permezz tas-servizzi tal-prokreazzjoni assistita, filwaqt li hemm mal-40 mara oħra tqila bl-użu tal-istess servizzi.
Chris Fearne stqarr li bħalissa qed jiġu ffinalizzati t-tenders neċessarji sabiex l-Isptar Mater Dei jakkwista t-teknoloġija neċessarja sabiex ikun offrut is-servizz tal-PGTM fejn indikat, bla ħlas, li sar possibbli permezz tal-emendi fil-liġi tal-IVF iktar kmieni din is-sena – dan filwaqt li qegħdin jitħarrġu l-professjonisti li se jkunu qegħdin jagħtu dan is-servizz.
L-investiment dirett barrani ta’ madwar €1 miljun minn HOPE Clinic ikompli jsaħħaħ il-qasam tal-life sciences f’pajjiżna fejn Malta Enterprise qed tkompli tattira l-investiment.
“Is-settur tal-life sciences huwa settur reżiljenti li jkompli jirreġistra tkabbir. Fix-xhur li għaddew, l-investiment f’dan is-settur mill-manifattura, faċilitajiet ta’ riċerka u żvilupp, u startups, qabeż it-€80 miljun. Dan l-investiment kien possibbli grazzi għall-ħidma tal-Malta Enterprise li qed taħdem favur niċeċ ekonomiċi ġodda bħalma huma l-biopharms u t-teknoloġija tal-life sciences”, qalet il-Ministru Miriam Dalli.
