“Din l-Arpa kienet weħlet minn saqajha ma arblu antik tad-dawl f’Kemmuna is-sena li għaddiet u dawn ir-ritratti kont ġbidthom jiena”. Iddikjara dan kaċċatur li xerred ritratti b’reazzjoni għall-istqarrija tal-Birdlife aktar kmieni llum fejn allegat li kienet ġabret għasafar feruti minn żoni protetti.
Il-kaċċatur filwaqt li appella lill-pubbliku biex ixerred kliemu, saħaq li kien hu stess li ġibed dawn ir-ritratti li qiegħed jippubblika u qal li xi nies kienu ċemplu lil tal-Birdlife biex jiġu għat-tajra li kienet diġà mejta.
Huwa kompla biex jisħaq li kien ilu sena jistenna biex tinħareġ stqarrija simili u għalhekk qiegħed ixerred dawn ir-ritratti biex skontu kulħadd ikun jaf dwar il-mibegħda li teżisti lejn il-kaċċaturi u n-nassaba.
