Il-President tal-FIFA, Gianni Infantino, stqarr li l-organizzar tat-Tazza tan-Nazzjonijiet Afrikani fix-xitwa kull sentejn “sar problema.”
Infantino qal dan hekk kif id-dibattitu qed ikompli jekk il-kampjonati kontinentali għandhomx ikomplu kif ippjanat, posposti għal data aktar tard, jew ikkanċellati għal kollox.
In-numru wieħed tal-football fid-dinja, Infantino, żvela li l-korp governattiv tal-football dinji għadu qed jikkonsulta mal-organizzaturi tat-Tazza tan-Nazzjonijiet Afrikani 2021, AFCON, biex jipposponi l-kompetizzjoni għal Settembru.
Fadal inqas minn ġimgħatejn għall-akbar festa tal-football tal-kontinent, iżda għad m’hemm l-ebda garanzija li se tibda fid-data skedata tas-6 ta’ Jannar.
L-aktar oppożizzjoni sinifikanti għat-tournament ġejja mill-Ewropa, speċjalment mill-Ingilterra, fejn il-clubs iqarsu wiċċhom biex jħallu wħud mill-aqwa stilel tagħhom jitilqu f’perjodu kruċjali tal-istaġun.
Per eżempju, Watford se jitilfu lill-attakkant eċċitanti Niġerjan, Emmanuel Dennis, filwaqt li Liverpool se jkollhom jgħaddu mingħajr iż-żewġ attakkanti stilel, Sadio Mane mas-Senegal u Mohamed Salah mal-Eġittu, għal xahar.
Il-varjant tal-coronavirus Omicron li qed jinfirex huwa wkoll ta’ tħassib, bl-AFCON 2021 diġà pospost darbtejn minħabba l-pandemija.
Minn Franza ħareġ rapport li jissuġġerixxi li l-Konfederazzjoni tal-Football Afrikana kienet qed tfittex li tikkanċella l-kompetizzjoni. CAF malajr ċaħdet ir-rapport u nsistiet li l-Kamerun 2021 se jipproċedi kif ippjanat.
Iżda l-President Infantino, fis-Summit Globali tal-FIFA tal-ġimgħa l-oħra, innota li l-AFCON huwa tournament importanti, iżda li tilagħbu f’Jannar saret problema.
Infantino kellu rwol ewlieni biex Patrice Motsepe sar president tal-CAF f’Marzu ta’ din is-sena.
Madankollu, l-ogħla amministratur, żvela li l-korp tal-football qed jiddiskuti l-possibbiltà li jkollu l-AFCON fi żmien meta jkun konvenjenti għall-partijiet interessati ewlenin involuti.
“It-Tazza Afrikana hija kompetizzjoni li tintlagħab kull sentejn: nifhmu l-importanza ta’ din it-Tazza,” qal il-president tal-federazzjoni mondjali.
“Sa ftit snin ilu ħadd ma kien jimpurtah li tintlagħab fix-xitwa. Issa, saret problema minħabba li ħafna players Afrikani jilagħbu ma’ clubs kbar, li jitilfuhom f’mument importanti tal-istaġun.
“Jekk nistgħu niskedaw mill-ġdid il-kalendarju u niżguraw li tintlagħab Tazza tan-Nazzjonijiet Afrikani fil-waqfa kbira internazzjonali f’Settembru, aktar milli f’Jannar jew Frar, konna nsolvu problema għal tant kampjonati li għandhom players Afrikani.
“Hija parti mill-proċess li qed nitkellmu dwaru. Ma nħobbx nitkellem dwar gwerer jew għedewwa, iżda dwar il-prova. Huwa importanti li nfittxu l-aħjar soluzzjoni flimkien.”
Is-Super Eagles huma fost l-24 team li se jkunu fil-Kamerun 2021.
In-Niġerja rebħu l-kampjonat fi tliet okkażjonijiet preċedenti: bħala organizzaturi fl-1980, fit-Tuneżija fl-1994, u fl-Afrika t’Isfel fl-2013.
