Influencer ta’ 21 sena mir-Tajlandja miet wara li laqa’ sfida li jixrob flixkun whisky f’daqqa u kien se jitħallas 840 ewro.
Thankam Kanthee, magħruf għal isfidi li jilqa’ minn segwaċi online, laqa’ din l-isfida biex b’hekk ikun jista’ jkollu xi ħaġa tal-flus għall-familja tiegħu f’dawn il-jiem ta’ festi.
Fost l-isfidi li għamel kien li xorob hand sanitiser u dakinhar kien anke spiċċa l-isptar.
Jirriżulta li grupp ta’ persuni kienu waqt festin tal-Milied meta daħlu online u għamlu din l-isfida lil Kanthee. Hu mill-ewwel laqa’ din l-isfida, iżda ftit wara li xorob il-flixkun whisky f’daqqa ntilef minn sensieh u ddaħħal l-isptar b’ambulanza.
Minkejja kull tentattiv biex isalva, xorta waħda hu tilef ħajtu.
Il-pulizija tal-pajjiż fetħu investigazzjoni biex jistabilixxu x’ġara eżatt, iżda rapporti fil-midja qegħdin jgħidu li kulma kien qiegħed jagħmel kien li laqa’ sfida biex ikun jista’ jalqa l-flus.
Jirriżulta li Kanthee jgħix minn fuq dawn l-isfidi biss u hu magħruf sew ma’ pajjiżu u issa anke kien qiegħed jieħu fama internazzjonali.
