Minn Cristian Muscat
Kif bdiet l-imħabba tiegħek lejn il-futbol?
Minn ta’ etá żgħira kont inħobb insegwi l-futbol ma’ missieri. Anke aħna t-tfal tar-raħal konna nħobbu niltaqgħu fit-triq nilgħabu bil-ballun. Aktar tard kien sar ground ġewwa l-iskola primarja ta’ San Lawrenz stess u konna nilgħabu hemmhekk ukoll.
Ħa mmur mal-ewwel għall-punt. X’tikkummenta fuq it-tragward tal-200 partita uffucjali fil-karriera tiegħek li lħaqt f’Ottubru li għadda?
Inħossni onorat li kelli l-opportunita’ u s-saħħa li nikseb dan it-tragward fl-etá li għandi. Meta nħares lura nħossni grat li kull kowċ wera fiduċja fija u kollha tawni ċ-ċans li nilgħab, għax kieku ma kontx nasal s’hawn.
Iddeskrivi l-esperjenza preżenti tiegħek ma’ St Laurence Spurs FC.
Għandna tim żġħir imma magħqud u qed nieħdu gost flimkien.
X’tikkummenta fuq l-andament tat-tim matul dan l-istaġun sa issa?
S’issa sejrin tajjeb. Kellna diversi rebħiet u xi ftit rizultati ħżiena. Baqa ħafna logħob x’jintlagħab. Nittamaw dejjem li nkunu fin-naħħa r-rebbieħa.
X’inhuma t-tragwardi tagħkom għal dan l-istaġun?
L-għan ta’ din is-sena hu li nkunu kompetittivi biżżejjed biex niġġieldu għar-rebħ tal-unuri.
Kif tqis il-livell tal-futbol Għawdxi fil-preżent?
Għalkemm matul is-snin saru xi tibdiliet għall-aħjar, nemmen li xorta baqa’ ħafna fejn nistgħu nimxu ‘l quddiem.
U dak tar-riżorsi (grawnds) fejn titħarrġu u tilagħbu l-logħob kompetittiv tagħkom?
Il-grawnds huma limitati ħafna. Il-grawnd li nużaw aħna tal-iskola primarja ta’ San Lawrenz huwa limitat fl-ispazju. Allura, darbtejn fil-ġimgħa jkollna t-training f’xi grawnd ieħor, skont id-disponibilta’.
Kif qed tħares lejn il-futur tiegħek fil-futbol?
Diment li jibqagħli s-saħħa u l-ħin, lest li nkompli nilgħab.
Għaddi messaġġ finali lil kull min jixtieq jagħmel karriera ta’ suċċess fil-futbol.
Lil min jixtieq jibni karriera fil-futbol ngħidlu ma jaqta’ qalbu qatt imma fuq kollox ifittex li jieħu gost tul dan il-vjaġġ. Jekk ma tkunx għal qalbek, tkun qiegħed fil-post żballjat!
