Anki jekk il-każijiet tal-COVID u l-influwenza għadhom rikurrenti, il-pnewmonja pnewmokokkali magħrufa aħjar bħala l-pulmonite, hija infezzjoni aktar baxxa fis-sider li toħloq riskji sinifikanti għas-saħħa fost l-anzjani, li s-sistemi immuni tagħhom ikunu ġeneralment inqas b’saħħithom. Bix-xitwa toqrob u bis-sistema tas-saħħa tagħna diġà mgħobbija żżejjed, din hija inizjattiva importanti biex inħarsu s-saħħa tal-anzjani tagħna.
Il-Gvern Malti dan l-aħħar ħabbar l-akkwist ta’ madwar 40,000 doża ta’ “Prevenar 20”, vaċċin li jiġġieled ir-riskju tal-pnewmonja pnewmokokkali jew pulmonite. Dan il-vaċċin beda jingħata b’xejn il-21 ta’ Ottubru.
“Irridu li l-anzjani tagħna, dawk li jieħdu ħsiebhom u l-qraba tagħhom ikunu konxji li l-Gvern issa qiegħed joffri vaċċin importanti li jista’ jgħin biex iwaqqaf il-mewġa ta’ infezzjonijiet fis-sider li s-soltu jiżdiedu matul ix-xhur kesħin,” spjega l-ispiżjar Kenneth Briffa minn Vivian, il-kumpanija tas-saħħa u l-benesseri li tipprovdi dan il-vaċċin.
Saħħa preventiva għall-persuni minn 65 sena ‘l fuq
Magħrufa wkoll bħala “PCV 20”, dan il-vaċċin jipprevjeni infezzjonijiet li jaffettwaw is-sistema respiratorja u ġie introdott bħala parti minn inizjattiva tas-saħħa preventiva għal dawk li għandhom 65 sena ‘l fuq, grupp identifikat bħala f’riskju akbar.
Briffa spjega kif, “hemm potenzjali li l-infezzjonijiet fis-sider jogħlew u dan jista’ jkollu impatt qawwi fuq il-popolazzjoni vulnerabbli ta’ anzjani u huwa għalhekk li qegħdin inħeġġu biex kemm jista’ jkun anzjani jikkunsidraw il-benefiċċji ta’ din it-tilqima, speċjalment minħabba ż-żieda aktar mis-soltu ta’ infezzjonijiet respiratorji li jkollna matul dawn ix-xhur”.
Prevenar 20 hija disponibbli mingħajr ħlas fiċ-ċentri kollha tas-saħħa f’Malta u tikkonsisti f’doża ta’ darba li tgħin biex tipproteġi lill-adulti minn 20 serotip ta’ batterji li jikkawżaw kemm pnewmonja pnewmokokkali kif ukoll mard pnewmokokkali invażiv. Barra minnhekk, dan il-vaċċin joffri wkoll protezzjoni kontra batterji pnewmokokki li jistgħu jkunu reżistenti għall-antibijotiċi u li jistgħu jwasslu għal kumplikazzjonijiet severi.
Sa Jannar li ġej, l-awtoritajiet tas-saħħa mistennija li jkunu żiedu l-istokk ta’ dan il-vaċċin għal iżjed minn 90,000 doża.
