Minn Cristian Muscat
Ftit tal-jiem ilu, Dejan Grech rebaħ il-kampjonat Ewropew tal-Pool meta fil-finali tal-kategorija individwali tal-irġiel għeleb lill-Ingliż Luke Gilbert bl-iskor ta’ 8-4.
Kienet ġurnata li Grech diffiċli jinsiha minħabba li aktar kmieni f’dik il-ġurnata, kiseb suċċess ukoll fil-finali tal-kategorija ta’ taħt il-25 bħala team kontra l-Irlanda A.
Grech wasal għal din il-finali wara li għeleb lill-player Irlandiż Gary Bracken bl-iskor ta’ 7-2 fis-semi-finali. Huwa ddomina ħafna mil-logħob u b’mod meritat wasal sa dan l-istadju.
Dejan Grech mhux isem ġdid għal-logħba tal-pool meta f’dawn l-aħħar snin beda jistabilixxi ruħu bil-mod bl-ewwel suċċessi li beda jikseb, bħala team.
Fil-fatt fis-sena 2020, huwa rebaħ it-titlu Ewropew tal-kategorija individwali taż-żgħażagħ li saru f’pajjiżna.
Grech għandu ħila kbira sabiex jirnexxi f’dan l-isport fejn huma numerużi l-breaks li kapaċi jagħmel sabiex litteralment iħalli lill-avversarju tiegħu bilqiegħda.
Il-kalma li biha jmur għall-boċċa u l-mod ta’ kif jirnexxielu jippotjaha jagħmel lil Grech wieħed uniku minkejja l-etá pjuttost żagħżugħa tiegħu.
Ta’ min wieħed isemmi li fis-sena 2020, huwa rebaħ l-unur tal-Isportiv tas-Sena.
Huwa deher ferm sodisfatt u kuntent b’dak li rnexxielu jagħmel għalkemm fl-istess ħin bilkemm seta’ jemmen li kiseb dan is-suċċess prestiġjuż.
Dan il-ġurnal għamel kuntatt ma’ Dejan fejn qasam l-esperjenza tiegħu.
Kif bdiet l-imħabba tiegħek lejn il-pool?
L-imħabba tiegħi lejn il-pool bdiet minn meta kont għadni tifel. Missieri kien jilgħab u jien bdejt nilgħab meta kelli 10 snin.
X’emozzjoniiet ħassejt wara li lħaqt dan it-tragward uniku?
Li kieku xi ħadd kellu jgħidli li jien kont se nirbaħ dan it-tournament internazzjonali, żgur kont immerih għax verament kollox ġie fuqi ħabta u sabta.
Huwa veru li kont ilni nipprepara għalih minn ħafna żmien ilu permezz ta’ taħriġ kontinwu iżda żgur ma kontx qed nippretendi li nasal sal-finali, aħseb u ara li nirbaħha.
Kif ippreparajt għal din il-kompetizzjoni?
Kont ilni nitħarreġ għal numru ta’ sigħat kuljum sabiex inkun fl-aqwa forma possibbli għax il-preparazzjoni hi kruċjali f’dan il-mument.
Dak tal-ġimgħa l-oħra kien l-aktar mument perfett li kelli fil-karriera tiegħi s’issa minħabba li flimkien mat-team ta’ Taħt il-25 sena għollejna tazza oħra.
Ħdimna qatigħ anke bħala team u konna magħqudin u naħseb li dik hi l-aqwa ħaġa li jista’ jkollok f’kull sport.
Minkejja li konna barra minn darna, konna kalmi, konċentrati u attenti f’dak kollu li konna qegħdin nagħmlu.
Hemm xi logħba li tiftakar aktar minn oħrajn li lgħabt fiha u rbaħt?
Bla dubju, l-aktar logħba importanti li lgħabt fiha s’issa hija dik li fiha ġejt inkurunat Champion Ewropew tal-eight ball fil-jiem li għaddew.
Nista’ niddeskriviha bħala l-aktar logħba emozzjonanti fil-karriera tiegħi s’issa. Madankollu insemmi wkoll il-finali ta’ meta ġejt inkurunat champion Ewropew tal-Pool ta’ Taħt it-23 sena. Dik ukoll tqanqal fija emozzjonijiet speċjali.
Kif irnexxielek tiżviluppa l-ħiliet tiegħek f’dan l-isport li tant tħobb?
Irnexxieli niżviluppa l-ħiliet tiegħi b’ħafna ħin ta’ dedikazzjoni u sagrifiċċju u ħinijiet twal ta’ taħriġ.
X’inhi l-iktar ħaġa importanti li għandu jkollu player tal-pool?
Fl-opinjoni tiegħi, l-aktar ħaġa importanti li għandu jkollu player tal-pool hija li jkollu mentalitá pożittiva u jemmen fih innifsu għax inkella ma jistax jilħaq l-objettiv prinċipali tiegħu.
Min taħseb li hu l-player numru wieħed tal-pool fid-dinja bħalissa?
Fl-opinjoni tiegħi, l-aqwa player tad-dinja tal-pool fil-mument huwa Mick Hill.
X’tikkummenta fuq il- Malta Eight Ball Federation u fuq il-Malta Pool Association u x’inhi d-differenza bejn iż-żewġ dixxiplini?
Il-Malta Eight Ball Federation hija federazzjoni serja bħalma ovvjament hija serja l-Malta Pool Association.
Min-naħa tiegħi nilgħab iż-żewġ logħbiet u t-tnejn fihom is-sabiħ tagħhom. L-eight ball hija tip ta’ logħba fejn trid iżjed tattakka minn dik tal-pool filwaqt li fil-pool jidħlu iżjed it-tatikka u l-moħħ fl-opinjoni tiegħi.
U x’inhi d-differenza bejn snooker u pool?
Id-differenza bejn snooker u pool hija li snooker hija logħba iżjed diffiċli sa ċertu punt.
Ir-raġuni hija ovvjament li l-mejda tas-snooker hija d-doppju ikbar mil-logħba tal-pool. Għaldaqstant fil-pool trid tkun konsistenti ħafna għaliex jekk tagħmel żball tista’ tgħid li tlift il-logħba.
Kif qed tħares lejn il-futur tiegħek bħala player tal-pool u fuq kollox x’ħolm u objettivi qed timmira għalihom?
Għandi ħafna ħolm li nixtieq inwettaq iżda fuq kollox għandna bżonn li dan l-isport ikollu aktar sponsors.
Ħaġa tal-iskantament li minkejja li kull darba niksbu suċċess fuq livell internazzjonali, diversi kumpaniji ma jaċċettawx li jgħinuna b’mod finanzjarju biex nilħqu l-għan tagħna.
Waħda mill-ħolmiet tiegħi hi dik li naqleb għal kollox bħala player professjonali għalkemm dan mhux faċli daqskemm wieħed jaħseb proprju minħabba li l-isponsors huma ftit.
Biex l-affarijiet jiġu aktar ħażin, bħalissa mhux faċli li ssib għajnuna bħal din minħabba l-impatt ħażin li kellu l-Covid-19 fuq diversi negozji u kumpaniji.
Fuq kollox nixtieq li bħala player professjonali, jekk xi darba nsir, immur nilgħab barra minn Malta u eventwalment dan isir ix- xogħol tiegħi.
Bla dubju li din mhux xi ħaġa faċli għalkemm jien se nibqa’ naħdem qatigħ sabiex nasal għaliha. Jekk dan iseħħ ikun pass kbir lejn il-karriera tiegħi.
Nixtieqek tgħaddi l-aħħar messaġġ tiegħek lil dawk iż-żgħażagħ li jixtiequ jaqbdu karriera fil-pool.
Il-messaġġ tiegħi huwa liż-żgħażagħ biex jaqbdu jilagħbu l-logħba tal-pool – logħba sabiħa li tagħtik sodisfazzjon kbir u għal min għadu żgħir ikollu ċ-ċans iżid il-kapaċitajiet tiegħu u jikber fil-logħba tal-pool. Fiha timmatura u tikber mentalment.
