Minn Cristian Muscat
Tom Saintfiet twieled fid-29 ta’ Marzu, 1973 fil-belt ta’ Mol fil-Belġju. Huwa għandu l-liċenzja UEFA Pro u huwa l-iżgħar coach li qatt mexxa club f’pajjiżu fl-etá ta’ 24 sena.
Lagħab football bejn l-1983 u l-1997 ma’ clubs Belġjani bħal Westerlo, KFC Lommel u KFC Verbroedering Geel.
Madankollu kellu jieqaf b’mod bikri fl-etá ta’ 24 sena sabiex eventwalment beda l-karriera ta’ coach.
Saintfiet jinsab fir-raba’ post fil-klassifika tal-iktar coaches b’numru ta’ partiti internazzjonali wara Guy Thys, Marc Wilmots u George Leekens.
Huwa għandu baċellerat fil-psikoloġija tal-isport u fis-snin li għaddew ħadem ukoll bħala kummentatur tekniku għat-televiżjoni Belġjan.
Saintfiet huwa wkoll l-awtur ta’ ktieb partikolari bl-isem ta’ Trainer Zonder Grenzen li jfisser Taħriġ bla Fruntieri fejn jagħti ħarsa lejn il-karriera tiegħu ta’ coach u l-filosofija li jħaddan.
Huwa mexxa diversi clubs fil-Belġju, Qatar, Ġermanja, Faroe Islands, Finlandja, Ġordan u l-Olanda.
Huwa kien ukoll fir-responsabbiltá ta’ diversi timijiet nazzjonali mill-Afrika fosthom Namibja, Zimbabwe, Etijopja, Malawi u Togo u issa l-Gambja.
Qabel ma’ mar jikkowċja n-Namibja, kien ittanta xortih fil-Premier League Finlandiż ma’ ROPS Rovaniemi.
Fis-sena 2002, Saintfiet kien fit-tmun tat-team mill-Faroe Islands, B71, fejn spiċċa fit-tieni post tal-klassifika.
Wara mar il-Qatar u ħa f’idejh it-team ta’ Al Gharafa Sports Club għal perjodu qasir. F’dan l-istess żmien il-federazzjoni ta’ dan il-pajjiż fdatlu f’idejh it-team nazzjonali ta’ Taħt is-17-il sena u għenhom jispiċċaw fit-tielet post tal-kampjonati Asjatiċi u eventwalment ikkwalifikaw għall-Kampjonati tad-Dinja tal-FIFA.
Qabel it-Tazza tad-Dinja tas-sena 2010 kien kandidat prospettiv li jmexxi lin-Niġerja f’dan it-tournament.
Huwa mexxa wkoll lil Trindidad and Tobago iżda kulma dam kien biss xahar għax wara erba’ logħbiet Saintfiet irriżenja.
Ħafna mill-kuntratti tiegħu kienu qosra l-iktar minħabba fondi limitati mill-pajjiżi fejn kien jikkowċja.
Huwa kapaċi jitkellem b’erba’ lingwi l-Olandiż, l-Ingliż, il-Franċiż u l-Ġermaniż.
X’tikkummenta fuq l-esperjenza tiegħek sa issa bħala coach tat-team nazzjonali tal-Gambja?
Meta ħadt it-tmun ta’ dan it-team lura f’Lulju tal-2018, il-Gambja kienet ilha ħames snin ma tirbaħ partita kompetittiva, f’Settembru 2013, kontra t-Tanżanija (2-0) fil-kwalifikazzjoni għat-Tazza tad-Dinja.
Ma kien hemm l-ebda tama … it-team kien fil-172 fir-rankings tal-FIFA. Iżda kelli proġett u minn kif qed juru r-riżultati, naħseb li mexjin fit-triq it-tajba!
… u dwar l-esperjenza tagħkom fl-aħħar edizzjoni tat-Tazza tan-Nazzjonijiet Afrikani fejn irnexxielkom taslu sal-kwarti tal-finali?
Anke qabel bdiet din il-kompetizzjoni, jien dejjem indirizzajt lill-media billi għedt li aħna l-underdogs, u li konna qegħdin fl-imsemmija kompetizzjoni biex nitgħallmu.
Fil-fatt, għalkemm ksibna riżultati tajbin f’din il-kompetizzjoni matul din is-sena, xorta waħda se jkollna ngħaddu mill-proċess ta’ qabel il-kwalifikazzjoni għall-AFCON fl-2023 peress li aħna fost it-12-il team l-agħar klassifikati fil-football Afrikan. Dan juri kemm aħna żgħar iżda naturalment l-ambizzjoni tiegħi hija li nibni xi ħaġa li tkun aktar fit-tul.
Ma nistgħux nilmentaw dwar kif mar il-kampjonat. Bħala Gambjani, kien meraviljuż li nkunu hawn għall-ewwel darba fl-istorja tal-pajjiż fit-Tazza tan- Nazzjonijiet tal-Afrika.
Il-Gambja tinsab fil-150 post fir-rankings uffiċjali tal-FIFA, u bħala debuttanti irnexxielna naslu sal- kwarti tal-finali fejn sfajna eliminati biss mill-ospiti, il-Kamerun.
Naturalment kellna ambizzjonijiet imma ma stajniex nimmaġinaw dan.
Konna nafu li kellna kwalitajiet wara li rbaħna l-grupp ta’ kwalifikazzjoni tagħna kontra l-Angola, il-Kongo u l-Gabon. Huma kollha pajjiżi rispettati iżda qatt ma kellna esperjenza ta’ tournament kbir.
Nistgħu naraw players tal-Gambja jilagħbu f’kampjonati maġġuri fl-Ewropa fiż-żmien li ġej?
Bħalissa, għandna żewġ players fil-League Two fl-Ingilterra – Ibou Touray ma’ Salford City u Ebou Adams ma’ Forest Green Rovers. F’għajnejja huma meraviljużi u jistgħu jilagħbu ogħla minn dan il-livell.
Għandna wkoll lil Modou Barrow, li huwa ex player ta’ Swansea u Reading u issa qed jilgħab fil- Korea t’Isfel fil-K-League 1 ma’ Jeonbuk Hyundai Motors. Madankollu, nista’ ngħid li għandi players oħra li joħolmu li kapaċi jagħmluha kemm fil-Premier League fl-Ingilterra u anke fis-Serie A fl-Italja.
Id-difensur ċentrali tagħna Omar Colley huwa miżżewweġ mara Ingliża u ilu l-aqwa player għal ħafna snin fis-Serie A ma’ Sampdoria. Inqis li dan il-player, iżda, jkun perfettament adattat għall-Premier League.
Naturalment, l-attakkant tagħna Musa Barrow li jilgħab ma’ Bologna fl-Italja huwa player żagħżugħ b’ħafna kwalitajiet u kien marbut fil-passat ma’ timijiet tal-Premier League. Fil-Kamerun wera l-importanza tiegħu għat-team.
Ejjew inkomplu nittamaw u naħdmu biex players tagħna jkunu jistgħu jagħmluha ma’ clubs elite fl-Ewropa.
Dan il-vjaġġ tal-ħolm tagħkom bħala team nazzjonali ntemm fil-kwarti tal-finali kontra l-Kamerun. X’tikkummenta?
Li rnexxielna naslu sal- kwarti tal-finali ta’ din il-kompetizzjoni diġá kien tragward uniku għalina.
Ikolli nistqarr li l-Kamerun kienu superjuri għalina u ta’ livell ieħor u finalment kien jimmeritahom li jirbħu. Madankollu, xorta waħda nħossni ferm kuntent u onorat li rnexxielna naslu s’hawn!
Dan kollu jindika li l-futur għat-team nazzjonali tal-Gambja huwa tabilħaqq wieħed sabiħ…
Għandna grupp żagħżugħ ta’ players li jistgħu jikbru xorta. Huwa importanti li nużaw din l-ewwel esperjenza fl-AFCON biex nikkwalifikaw aktar ta’ spiss – fl-2023, 2025 u forsi anke biex inkunu fit-Tazza tad-Dinja fl-2026.
Urejna f’dawn l-aħħar tliet snin u nofs dak li nistgħu nagħmlu wara li rbaħna l-grupp ta’ kwalifikazzjoni tagħna u ġejna draw man-Niġerja fil-kampanja preċedenti tagħna.
Għelibna wkoll lill-Marokk f’partita ta’ ħbiberija barra minn darna. Kellna riżultati tajbin kontra timijiet kbar u għalhekk konna nafu li konna kompetittivi.
Bħala team, il-mira tagħna hija ferm ogħla minn dak li kkomunikajna lill- pubbliku. Aħna qegħdin fit-triq it-tajba u dejjem nistgħu nitgħallmu mil- limitazzjonijiet tagħna.
Tista’ toħlom, iżda huwa fil-ground li trid tagħmel il-ħolm realtá.
Ma nistgħux ma nsemmux l-esperjenza qasira fit-tmun tat-team nazzjonali Malti ….
Kienet esperjenza qasira wisq għalija iżda xorta waħda nibqa’ ngħożżha fil-karriera tiegħi. Ma kellix iċ-ċans naħdem biżżejjed u kemm xtaqt, peró nawgura l-aqwa ġid possibli lit-team nazzjonali Malti, fejn għadni nsegwi lil dan it-team u qed nieħu gost narah jagħmel ċerti avvanzi taħt il-gwida tal-coach Devis Mangia.
