Minn Cristian Muscat
Kif bdiet l-imħabba tiegħek lejn il-football?
Naħseb meta kelli tliet snin bdejt nilgħab il-football.
Il-logħba tal-ballun minn dejjem għoġbitni u jien kelli lil missieri li kien jilgħab il-football ma’ diversi clubs Maltin u Għawdxin. Jien kont immur narah u kont dejjem noħlom li nsir bħalu. U llum ninsab hawnhekk nilgħab ma’ Birkirkara FC bħala goalkeeper.
Kif għażilt li tilgħab bħala goalkeeper meta tqis li missierek, Dybril, kien jilgħab bħala difensur?
Ħafna nies isaqsuni din il-mistoqsija. Jien ngħid li titwieled bħala goalkeeper, ħadd ma jġiegħlek tilgħab f’pożizzjonijiet li ma tixtieqx. Jien minn dejjem kien jiġbidni dan l-irwol bejn il-lasti u aktar ma għadda ż-żmien, aktar sirt nieħu gost. Tassew ninsab kuntent issa iktar u iktar għax bdejt nilgħab fl-ewwel ħdax ta’ Birkirkara, l- akkademja li ilni tant magħha.
Kif tiddeskrivi din il-mixja fin-nursery ta’ Birkirkara?
Nista’ ngħid b’wiċċi minn quddiem li ninsab f’waħda mill-aqwa nurseries li hawn fil-Gżejjer Maltin. Hemm coaches paċenzjużi ħafna, jgħallmuk il-ħiliet tant neċessarji fil-football filwaqt li tibda tieħu l-esperjenza tiegħek bil-mod. Ftit ftit jekk tisma’ mill-coaches jirnexxielek tasal fil-livell li tixtieq int. Minn hawn nixtieq nieħu din l-okkażjoni sabiex nirringrazzja lill-coaches kollha li tħarriġt magħhom f’dawn is-snin kollha f’din in-nursery.
Semmejt l-ewwel mumenti tiegħek fil-Kampjonat Premier ma’ Birkirkara. Tista’ tgħid li ġiek iċ-ċans u ħadtu. Kif qed tgħix dan iż-żmien partikolari?
Ninsab kuntent li ġieni ċ-ċans nilgħab mal-ewwel 11 ta’ Birkirkara. Għalija dan hu pass kbir ‘il quddiem fil-karriera tiegħi u dan l-istess ċans ħadtu mill-ewwel.
Se naħdem qatigħ sabiex inżomm posti għax verament irrid ngħin lil dan it-team li tani ħafna matul dawn is-snin u issa se nkun qed inroddilhom lura l-fiduċja li dejjem tawni.
Fil-logħba kontra Gzira United, int kont ivvutat bħala l-BOV Player tal- Partita. Kif ħassejtek meta smajt ismek minn fuq il-PA System?
Biex ngħidlek is-sew għall-bidu ma tajtx każ li kont ivvutat bħala l-BOV Player tal-Logħba mill-ġurnalisti preżenti.
Dak il-ħin kont ferm ikkonċentrat f’din il-partita speċjalment lejn l-aħħar meta Gżira United bdew jagħfsu mhux ftit sabiex iġibu l-iskor indaqs. Imbagħad membru talfamilja nfurmani li verament kont meqjus bħala l-aqwa player f’din il-partita u kont ferħan se ntir.
Taħseb li għandkom team li hu qawwi biżżejjed li tistgħu tirbħu l-kampjonat?
Jien ninsab mija fil-mija ċert li aħna se nkunu fost il-protagonisti ta’ dan il- Kampjonat Premier u ninsab konvint li kapaċi nirbħu l-kampjonat.
Issa li ninsabu f’pożizzjoni tajba fil-klassifika qed nemmen aktar minn qatt qabel.
Għandna skwadra b’potenzjal enormi u għalhekk kapaċi nkunu tajbin f’kull logħba li nilagħbu.
X’inhi l-opinjoni tiegħek dwar il-coach ta’ Birkirkara, André Paus?
Nista’ ngħidlek li André Paus huwa wieħed mill-aqwa coaches li qatt kelli kemm ilni nilgħab.
Huwa kellu fiduċja fija sa mill-bidu u verament jaf x’inhu jagħmel. Juża tattika u teknika tajba ħafna filwaqt li ma joqgħodx iħares lejn ismijiet iżda jilgħab min verament ikun ħaqqu.
U x’inhi l-opinjoni tiegħek dwar il-kumitat ta’ dan it-team immexxi mill- president Michael Valenzia?
L-ewwelnett nirringrazzja lill-president innifsu li dejjem emmen fija u tani l-kuraġġ tant meħtieġ.
Hu kumitat li jaf x’inhu jagħmel u jħaddem moħħu sabiex dejjem jiġu akkwistati l-aqwa elementi possibbli.
Kemm qed titgħallem mill-goalkeeper titolari ta’ Birkirkara li bħalissa jinsab imweġġa’, Daniel Marcio Fernandes?
Daniel Marcio Fernandes huwa ferm iktar minn kollega u goalkeeper.
Inqisu bħala t-tieni coach tiegħi, bejnietna m’hemmx rivalitá anzi hemm rispett reċiproku
Hu jħobb ħafna jagħtini diversi pariri u jien inħobb nisma’ minnu għax hu għandu esperjenza kbira filwaqt li lagħab ma’ diversi timijiet prestiġjużi.
Kemm int kuntent bil-grounds fejn qed jintlagħb fih il-Kampjonat BOV Premier?
Biex ngħidlek il-veritá s’issa lgħabt biss fl-Istadium Nazzjonali u ma kellix iċ-ċans nilgħab f’Tony Bezzina Stadium, f’Kordin.
Nista’ ngħidlek li l- ground f’Ta’ Qali hu ferm sabiħ u togħġobni ferm l- atmosfera li jkun hemm. Dejjem aħjar tilgħab fuq il-ħaxix naturali milli f’dak artifiċjali.
Taqbel ma’ Kampjonat Premier bi 12-il team?
Iva u le. Nemmen li iktar ma jkun hemm timijiet, iktar se jkun hemm kompetizzjoni. Sabiħ li jkollna iktar logħob u fuq kollox tilgħab kontra timijiet differenti.
Taqbel li team li jieħu sehem fl-ogħla kampjonat Malti jkun jista’ jilgħab bi 11-il player barrani?
Ma tantx naqbel dwar dan kollu. Veru li jekk tkun player Malti tajjeb, xorta se ssib postok mal-ewwel ħdax iżda mbagħad naħseb players oħrajn lokali ftit se jkollhom ċans jesprimu ruħhom kif suppost u forsi jilagħbu ftit.
Nemmen li għandna talent lokali biżżejjed u m’hemmx għalfejn jiżdiedu aktar players barranin.
Kif qed tħares lejn it-team nazzjonali Malti? Qed tittama li xi darba tissejjaħ mill-coach Devis Mangia?
Biex inkun għedtlek kollox, diġá kelli esperjenza żgħira nitħarreġ mat-team nazzjonali Malti meta dak iż-żmien bħala coach kien hemm Ray Farrugia.
Nemmen li bil-perseveranza u d-determinazzjoni, kapaċi nissejjaħ fl-iskwadra xi darba jew oħra.
Jien se nkun qed nimmira għal dan il-pass u huwa għalhekk li nixtieq nilgħab aktar regolari ma’ Birkirkara.
Għandek xewqa li tilgħab barra minn Malta?
Din hi waħda mill-ikbar xewqat tiegħi li jiġi xi ħadd li jikkuntattjani sabiex nilgħab magħhom.
Madankollu jien inħobb nieħu l-affarijiet pass pass u ma ngħaġġilx. Ix-xewqa tibqa’ dik iżda l-ewwel irrid nara li nkompli nżid il-livell tiegħi bejn il-lasti.
Kif qed tara l-futur tiegħek?
Bħalissa għandi kuntratt ma’ Birkirkara li jiskadi fis-sena 2025. Kif għedtlek l-għan hu li nissejjaħ mat-team nazzjonali Malti filwaqt li naħdem għal esperjenza barra minn xtutna. Nemmen li kapaċi nagħmilha iżda rrid nirsisti dejjem aktar sabiex dawn ix-xewqat isiru realtá.
Nixtieqek tgħaddi messaġġ lil dawk il-partitarji ta’ Birkirkara li jiġu l- ground jagħtukom is-sapport meħtieġ.
L-ewwelnett nixtieq nirringrazzja lill-partitarji numerużi tagħna li jkunu magħna kull meta nilagħbu.
Nemmen li għad għandna bżonn ħafna s-sapport tagħhom u għalhekk nistieden aktar partitarji ta’ Birkirkara sabiex jiġu l- ground u jagħtuna kuraġġ f’dan il-mument li jien inqisu kruċjali għall-istaġun tagħna.
Dan l-appoġġ huwa tant apprezzat!
