Minn Cristian Muscat
Aaron Younger twieled fil-belt Awstraljana ta’ Perth nhar il-25 ta’ Settembru 1991 u llum il-ġurnata għandu 29 sena. Huwa kkunsidrat bħala wieħed mill-aqwa players tal-waterpolo Awstraljan tal-mument.
Qabel beda l-waterpolo, għamel żmien twil jikkompeti fl-għawm fejn ħa sehem f’diversi kompetizzjonijiet internazzjonali fuq bażi individwali.
Beda l-karriera tiegħu mat-team lokali ta’ Fremantle Mariners filwaqt li lagħab ukoll fuq livell internazzjonali fl-Ungerija ma’ Szeged u aktar tard mat-team rinomat ta’ Ferencvaros Torna Club, qabel ingħaqad mat-team qawwi li jilgħab fis-Serie A1 Taljana, Pro Recco.
Younger jilgħab bħala centre back u kellu ċ-ċans jiddebutta mat-tim nazzjonali Awstraljan fis-sena 2009. B’kollox hu lagħab 199 darba ma’ dan it-team. Hu jgħid li hu privileġġ li tirrappreżenta lil pajjiżek
Hu magħruf għax-xutt qawwi b’idu l-leminija li ftit jagħti ċans lill-goalkeeper avversarju jsalva kif suppost. Mhux ta’ b’xejn li hu għażla naturali mat-timijiet kollha li lagħab magħhom fejn dejjem jibda mal-ewwel seba’ players.
Il-player meqjus bħala veteran fil-waterpolo Awstraljan ipparteċipa f’diversi avvenimenti internazzjonali bħal World University Games, il-kampjonat mondjali tal-FINA u World League Finals.
Fl-istess waqt huwa ħa sehem f’żewġ edizzjonijiet tal-logħob Olimpiku 2012 f’Londra u 2016 f’Rio de Janeiro. Fl-ewwel esperjenza tiegħu f’Londra, hu kien l-iktar player żagħżugħ tal-grupp.
F’dawn l-avveniment kollha sportivi huwa rebaħ numru kbir ta’ midalji sabiex sar wieħed mill-iktar players Awstraljani ta’ suċċess.
Kif bdiet l-imħabba tiegħek lejn il-waterpolo?
Bdejt nilgħab il-waterpolo meta kont żgħir ħafna. Kont imdorri mmur il-pixxina ta’ Perth biex nara l-avveniment sportivi li kien ikun hemm.
Darba kien hemm coach partikolari li ħajjarni nibda fl-għawm u jien aċċettajt.
Dan l-istess coach bħal qisu xprunani sabiex nagħmel dan il-pass li minn dejjem xtaqtu u li iżda ma kelli lil ħadd min jinkoraġġini.
Wara xi żmien darba fost l-oħrajn kont lgħabt logħba waterpolo ma’ sħabi. Niftakar li l-ħin ma rajtux għaddej u ridt inkompli nilgħab.
Minn hemm indunajt li din il-logħba kelli tkun dik li nagħmel karriera biha.
Biż-żmien bdejt intejjeb il-livell tiegħi tant li ġejt magħżul biex nilgħab għat-team nazzjonali Awstraljan meta kelli biss 19-il sena.
Kien ta’ unur li rrappreżentajt lil pajjiżi għal ħafna drabi fosthom iż-żewġ edizzjonijiet tal-Logħob Olimpiku f’Londra u f’Rio de Janeiro.
Kemm hu imporanti li barra li tkun player ta’ waterpolo tajjeb, tkun għawwiem mill-aqwa?
Jien ngħid li l-għawm huwa kollox. L-għawm jgħinek tikkordina ruħek f’din il-logħba filwaqt li trid tkun ħafif biżżejjed biex tiżgiċċa lill-avversarju tiegħek.
L-għawm jgħinek ukoll sabiex tkun iktar b’saħħtek bħala logħob u fuq kollox li tiżviluppa l-kapaċitajiet tiegħek bħala player. Prattikament b’għawma tajba int tkun player komplut.
Bir-regoli l-ġodda li ġew ivvintati, wieħed irid ikun għawwiem tajjeb biex jirnexxi f’dan l-isport.
Kellek esperjenza mill- aqwa tilgħab fl-Ungerija ma’ Ferencvaros. Xi tgħidli dwar dan it-team?
Ferencvaros hu wieħed mit-timijiet ewlenin li hemm fil-waterpolo Ungeriż. Hu magħruf ukoll fix-xena tal-football internazzjonali.
Magħhom kont ilni sa mis-sena 2018 fejn irbaħt ħafna fejn għandu x’jaqsam waterpolo f’dan il-pajjiż.
Xtaqt komplejt l-istaġun attwali iżda minħabba l-pandemija tal-Covid-19 dan kollu ma kienx possibbli.
Aktar qabel kelli x-xorti nilgħab ma’ Szeged fejn għamilt tliet staġuni oħra mill-aqwa.
Lgħabt ukoll fil-kampjonat Kroat u Awstraljan fejn komplejt inkabbar l-esperjenza tiegħi.
Ilek sena tilgħab ma’ ma’ Pro Recco fl-Italja. Żgur li tinsab kburi li għamilt dan il-pass hux hekk?
Iva żgur li Pro Recco hu wieħed mit-timijiet ewlenin mhux biss fl-Italja iżda wkoll fl-Ewropa.
Hemm kompetizzjoni kbira sabiex issib postok mal-ewwel sebgħa għalkemm jien qed nagħmel ħilti kollha sabiex inġib fid-diffikultá lill-coach Sandro Sukno.
X’tikkummenta dwar l- esperjenza mat-team nazzjonali Awstraljan?
Kull darba li lbist il-kappa tat-team nazzjonali Awstraljan, minn dejjem ħassejtni kburi. Jien lgħabt ħafna logħbiet f’dawn l-aħħar snin u kull darba li nkun se nilgħab għal pajjiżi nħoss dik ir-responsabbiltá kbira.
Matul is-sajf li għadda irrapreżentajt lil pajjiżi fl-Olimpjadi ta’ Tokjo, fejn ksibna riżultati mħallta. Din tkun it-tielet edizzjoni tal-logħob Olimpiku li ħadt sehem fiha fil-karriera tiegħi sa issa.
… u dwar il-livell tal-waterpolo Awstraljan?
Il-waterpolo f’dan il-pajjiż huwa ferm popolari u għandna livell ferm interessanti.
Dejjem qed nippruvaw nersqu ‘l quddiem lejn livell aqwa. Minkejja kollox trid ħafna taħriġ biex ittejjeb il-livell tiegħek.
Illum il-kompetizzjoni żdiedet u għalhekk trid timxi ma’ dan il-progress sabiex tibqa’ kompetittiv.
Bħala team nazzjonali naħseb li bil-mod il-mod resqin sabiex nagħmlu l-qabża fil-kwalitá.
Qatt għaddielek minn rasek li tiġi tilgħab f’Malta matul ix-xhur tas-sajf fil- kampjonat ewlieni?
Naħseb kieku tkun idea tajba ħafna. Kieku jkolli ċans u x-xorti li nilgħab hawn mhux se ngħid le żgur.
Fit-training camp li kellna fil-jiem li għaddew, konna kuntenti ferm li kellna ċ-ċans nitħarrġu f’Malta.
Huwa post sabiħ fejn tkun u l-ospitalità kienet waħda tal-għaġeb. Li nkunu f’Malta tana ċ-ċans li nkomplu ninbnew bħala team u nippreparaw qabel ma jibda l-istaġun twil li qed jistenniena.
Taħseb li għandkom l-ingredjenti kollha biex staġun ieħor tirbħu kull unur possibbli?
Għandna staġun twil quddiemna bħal dejjem u qed nippreparaw bl-aħjar mod għalih.
L-ambjent huwa tajjeb u kulħadd qed jimxi perfettament. Se jkun staġun twil ħafna din is-sena imma għandna l-ingredjenti kollha biex niksbu affarijiet kbar flimkien.
Kollox jiddependi minn dawk l-aħħar logħob tal-istaġun tas-sena d-dieħla.
Għoġbuk ir-regoli l-ġodda li daħlu fis-seħħ fil-waterpolo fix-xhur li għaddew?
Biex inkun qed ngħidlek kollox, inutli nagħti l-opinjoni tiegħi dwar dan is-suġġett meta tqis li huma l-FINA li timponi u tiddeċiedi kollox.
Aħna rridu nadattaw għal dawn ir-regoli u nippruvaw nidrawhom. Min jikkmanda jagħmel il-liġi u l-protagonisti jridu jaddattaw għalihom.
Jekk saru dawn ir-regoli sinjal li huma ta’ ġid għall-waterpolo in ġenerali.
Kif tarah il-futur tiegħek?
Qed inħares li jibqa’ jkolli wirjiet tajbin sabiex nibqa’ nilgħab f’mod regolari.
Fejn għandu x’jaqsam it-team nazzjonali, nixtieq inkompli nilgħab għal aktar żmien u ngħin liż-żgħażagħ li telgħin bl-esperjenza tiegħi.
Nixtieqek tgħaddi l- aħħar messaġġ lit-tfal u ż-żgħażagħ li jixtiequ jaqbdu sport ġdid.
Lit-tfal u ż-żgħażagħ li qed jaqraw din l-intervista ngħidilhom li qatt m’ għandhom jaqtgħu qalbhom u jibqgħu għaddejjin.
Iva fil-fatt hekk hu! Wieħed għandu jaċċetta l-isfida u jieħu ċ-ċans biex dejjem itejjeb il-livell tiegħu.
