Minn Cristian Muscat
Kif bdiet l-imħabba tiegħek lejn il-waterpolo?
Minn mindu kont żgħira, il-ġenituri tiegħi minn dejjem kienu jeħduni l-pitch ta’ Sirens u jiena u nikber dejjem kont insegwi t- taħriġ tal-għawm u tal-waterpolo.
Għal xi snin jien kont nipprattika s-synchronized swimming iżda meta l-club ta’ Sirens iddeċieda li jagħmel team tan-nisa tal-waterpolo, tħajjart u bdejt nittrejna dan l-isport ukoll.
Maż-żmien bdejt niffoka aktar fuq il-waterpolo u għażilt li nkompli nitħarreġ f’din id-dixxiplina.
X’tikkummenta fuq l-istaġun li għadda ma’ Sirens li fih irbaħtu l-kampjonat?
L-istaġun li għadda kien wieħed pożittiv ħafna għalina fejn ħdimna qatigħ bi preparazzjoni għall-kampjonat fejn bl-impenn assolut u b’determinazzjoni ta’ kulhadd irnexxielna nirbħu t-titlu tal-kampjonat, meta wieħed jikkunsidra li kellna team b’etá medja ta’ 16-il sena.
Nemmen li dan is-suċċess wasal bit-taħriġ li għamilna. Kellna preparazzjoni intensiva taħt il-gwida tal-coach Dale Dowling.
Kien siewi wkoll is-sapport kontinwu tal-head coach, Marko Orlovic, u l-kumitat li dejjem emmen fina. Naħseb li bid-determinazzjoni u l-kollettivirnexxielna naslu fejn riedna. Nemmen li bħala team aħna beżlin u nieħdu t- taħriġ bis-serjetá.
L-ewwel logħba kontra Sliema tlifna minħabba l- esperjenza u s-saħħa tagħhom.
Għalkemm fl-ewwel tliet sessjonijiet konna minn fuq, fir-raba’ sessjoni meta bdew jiskorjaw, aħna ppanikkjajna u tfixkilna, iżda mbagħad fl-aħħar logħba kontra l-istess Sliema urejna l-grinta u d-determinazzjoni tagħna bħala team.
U fuq il-fatt li rbaħt l- unur prestiġjuż tal-Player tas- Sena?
L-ewwel nett nixtieq nirringrazzja lil min ivvutali, lill-coaches u l-kollegi tat-team tiegħi għax mingħajrhom ma stajtx nirbaħ dan l-unur. Ninsab kuntenta għax sirt naf li jkun hemm ħafna coaches u uffiċjali tal-clubs li jkunu qed jagħtu l-voti tagħhom għal dan l-unur.
Il-fatt li rbaħtu ta’ etá daqshekk żgħira jagħtini aktar motivazzjoni biex inkompli naħdem u ntejjeb lili nnifsi biex sena wara sena nkompli bil-progress tiegħi.
X’tikkummenta fuq it- tournament li ħadtu sehem f’Ruma fil-ġimgħat li għaddew? Kemm tgħallimtu minn din l-esperjenza?
It-tournamnet li ħadna sehem fih f’Ruma kien esperjenza sabiħa ħafna fejn tgħallimna u rajna tattiċi li lanqas qatt ma rajna qabel.
Għalkemm lgħabna kontra nisa ikbar minna u li huma ħafna aħjar u aktar b’saħħithom minna, xorta rnexxielna naħdmu bħala team, inġibu tkeċċijiet u niskorjawlhom.
Indunajna wkoll x’differenza kbira hemm bejn il-livell tal-waterpolo barrani ikkumparat ma’ dak ta’ Malta. Dawn l-atleti professjonali jagħmlu sagħtejn għawm filgħodu, siegħa u nofs gym jew taħriġ fuq l-art wara nofsinhar u sagħtejn tattika filgħaxija.
Min-naħa tagħna, peress li aħna iżgħar u ħafna minna għadna nistudjaw diġá huwa sagrifiċċju għalina u għall-ġenituri tagħna li nitħarrġu sagħtejn kuljum.
Fl-għawm kważi kważi konna magħhom fejn ma kellhomx ħafna ħarbiet iżda huma b’saħħithom fiżikament minħabba li jagħmlu ħafna gym allura meta lagħbu bit-tattika tal-pressing bdejna nbatu.
Meta ġew biex jattakkaw kellhom tqassim veloċi ħafna u xuttijiet b’saħħithom. Din is-sena naħseb li għandna niffukaw fuq ittaħriġ fuq l-art biex fl-ilma nħossuna aktar b’saħħitna.
Dawn l-esperjenzi jgħinu fil-progress tal-atleta u nirringrazzja lill-club li ħa din id-deċiżjoni biex jagħtina din l-opportunitá.
X’tikkummenta fuq il-coach Dale Dowling?
Il-coach Dale Dowling huwa persuna determinat u bieżel ħafna, għandu paċenzja kbira għal magħna iżda jagħmel minn kollox biex jgħinna u biex jgħallimna dak li jaf hu.
Bis-saħħa tiegħu aħna ningħaqdu ħafna aktar flimkien u jieħu interess personali fina. Għandna relazzjoni tajba ħafna miegħu fejn nirrispetawh u hu jqatta’ ħafna ħin magħna fil-ġimgħa allura sar jafna waħda waħda bil-kapaċitajiet u d-difetti tagħna kollha.
F’dawn is-sentejn li ilu l-coach tagħna għamilna kambjament kbir. Huwa raġel li jħobb jitgħallem kemm mill-head coach Marko Orlovic u meta sifirna ra wkoll x’għamlu l-coaches l-oħra u tgħallem mit-tattiċi tat-timijiet l-oħra u ħa xi ħaġa minn din l-esperjenza wkoll biex fl-aħħar mill-aħħar ikompli jgħallem lilna.
X’tikkummenta fuq ir- riżorsi (pixxina) li fihom tittrenjaw u tilagħbu f’Malta?
Fil-kampjonat tan-nisa f’Malta qed nilagħbu f’pitch żgħir u meta mmorru nikkompetu barra minn xtutna nilagħbu f’pitch kbir.
Għaldaqstant f’Malta għandna nilagħbu bħalma jilagħbu l-irġiel, fil-pitch il-kbir. Bħala Sirens issa għandna l-pixxina l-ġdida tagħna u allura għandna l-ħin allokat għalina li fih nitħarrġu aktar.
X’tikkummenta fuq it-team nazzjonali tal-waterpolo tan-nisa ta’ Taħt is-17-il sena, li int membru importanti tiegħu?
Hija esperjenza sabiħa oħra li tkun parti mit-team nazzjonali wkoll. Tħossok onorata li tirrappreżenta lil pajjiżek f’kampjonati fuq livell Ewropew.
B’dan it-team ta’ taħt is-17 il-sena kkompetejna fil- Kroazja, f’Awwissu li għadda, u konna rbaħna żewġ logħbiet kontra l-Bulgarija u r-Rumanija, fejn kellna prestazzjonijet pożittivi. Għalkemm inkunu ġejjin minn timijiet differenti meta nittrenjaw bħala team nazzjonali tispiċċa r-rivalitá li jkollna bejnietna u nibdew naħdmu sew flimkien.
Issa qegħdin nippreparaw għal-Logħob ta’ Kwalifikazzjoni Ewropew li ser isiru f’Malta, f’Marzu 2022.
… u fuq il-coach Anthony Farrugia?
Il-coach, Anthony Farrugia, ilu jikkowċjana allura jaf il-qawwiet u n-nuqqasijiet tagħna sew u jiffoka biex itejbilna l-livell tagħna u waqt it-taħrig ma’ Malta jiffoka fuq l-għawm, tattiċi li nkunu se nagħmlu kif ukoll ħafna leg work għaliex huwa importanti li niffukaw fuq is-saħħa ħalli meta mmorru nikkompetu barra minn Malta nkunu aktar b’saħħitna.
Kif qed tħares lejn il-futur tiegħek fil-waterpolo?
Nixtieq li mmur nittrenja u nilgħab barra minn Malta. Din l-ambizzjoni tkompli timlini b’determinazzjoni biex inkompli nitħarreġ u nilgħab fuq livell ieħor ma’ club barrani fejn ma’ dawn it-timijiet persważa li nista’ nieħu l-massimu mingħand players aħjar minni u tgħini niżviluppa aktar fil-logħba tal-waterpolo li tant inħobb.
Tista’ tgħaddi messaġġ lil dawk li bħalek jixtiequ jagħmlu karriera fil-waterpolo?
Fejn tidħol saħħa, personalitá u karattru huwa utli li t-tfal u ż-żgħażagħ jipprattikaw xi sport.
Nieħu pjaċir ħafna meta nara iżjed tfal żgħar li bdew jilagħbu l-waterpolo għax dan huwa sport fejn jidħol ħafna teamwork u kif kulħadd jista’ jara mir- riżultati, Malta qed tikseb ħafna riżultati pożittivi u rispett mill-pajjiżi kollha.
Għaldaqstant, nixtieq inħeġġeġ lit-tfal żgħar biex jippruvaw jilagħbu l-waterpolo għax ninsab ċerta li ladarba jibdew, jindunaw kemm hu sabiħ speċjalment aħna l-Maltin li aħna mdawrin bil-baħar.
