Il-Prim Ministru Robert Abela żar il-faċilitajiet ta’ Y&P Cranes fin-Naxxar. Din hija kumpanija Maltija li gawdiet mill-growth scheme u, b’investiment ta’ €1.7 miljun, Y&P Cranes kompliet tinvesti f’total ta’ seba’ krejnijiet ġodda mgħammra bl-aħħar teknoloġija.
Fil-preżenza tad-Direttur ta’ Y&P Cranes Raymond Gauci, il-Prim Ministru Robert Abela qal li fl-aħħar jiem kellna tliet rapporti li lkoll taw ċertifikat b’saħħtu għall-ekonomija Maltija.
Hawn, il-Prim Ministru sostna li dan kien dovut ukoll għal ħidmet l-intrapriżi li wrew reżiljenza liema bħalha waqt sfidi bla preċedent u issa qed juru fiduċja li jkomplu jinvestu f’pajjiżna u jsaħħu s-settur tax-xogħol.
“Dak li qalu Fitch, Moody’s, u anki l-Kummissjoni Ewropea, li Malta se tibqa’ miexja ‘l quddiem f’mixja ta’ tkabbir ekonomiku għandu jimlina b’kuraġġ biex niksbu iżjed. Hemm sfidi u ta’ dan nista’ nassigurakom li se ssibu gvern ta’ spalla bħalma sibtuh waqt pandemija”, saħaq Dr Robert Abela, flimkien mat-tmexxija ta’ Y&P Cranes.
F’dan il-kuntest, in-negozju ta’ Y&P Cranes, immexxi mill-familja Gauci, kompla jixhed bil-fatti dak li saħaq il-Prim Ministru.
Imwaqqfa lura fl-2000 mis-Sur Raymond Gauci, illum il-ġurnata Y&P Cranes tiffoka primarjament fuq il-kirjiet tal-krejnijiet, il-bejgħ, u l-manutenzjoni ta’ tower cranes.
Għalkemm bdiet l-operat tagħha b’sitt krejnijiet biss, il-kumpanija kibret b’mod sostanzjali u sal-lum il-ġurnata impurtat iżjed minn 400 krejn; b’ammont ieħor qawwi ta’ krejnijiet lesti għall-esportazzjoni.
Fl-aħħar erba’ snin Y&P Cranes irduppjat in-numru ta’ ħaddiema li timpjega.
Waqt iż-żjara, il-Prim Ministru nnota wkoll it-taħriġ li jingħata fil-post tan-negozju stess lil ħaddiema bil-għan li jibqgħu jtejbu l-ħiliet tagħhom u joffru kwalità ta’ xogħol iżjed effiċjenti.
Min-naħa tiegħu, id-Direttur tal-kumpanija s-Sur Raymond Gauci qal li llum il-ġurnata il-proġetti huma impenjattivi ħafna u bl-għajnuna tal-fondi maħruġa mill-iskema, il-kumpanija setgħet tagħmel il-qabża li dejjem xtaqet u tinvesti f’aktar tagħmir ġdid bil-għan li jintlaħqu t-talbiet tal-klijenti.
“Il-missjoni tagħna hija li nagħmlu s-siti tal-kostruzzjoni aktar produttivi u aktar siguri b’tagħmir tal-aħħar teknoloġija u forza ta’ xogħol imħarrġa”, stqarr is-Sur Gauci.
