L-Aġenzija Kulturali għall-Belt Valletta tistieden lil kulħadd jiċċelebra l-Milied fil-Belt Kapitali fl-2025 mill-25 ta’ Novembru sal-31 ta’ Diċembru.
Il-programm ta’ din is-sena jinkludi l-purċissjoni tradizzjonali tant maħbuba bil-Bambin Ġesù madwar it-toroq tal-Belt Valletta akkumpanjata minn kor live, kunċerti live mill-kantanti lokali Klinsmann, Kevin Paul, The New Victorians u Riona, briju madwar it-toroq tal-Belt minn Tikka Banda, attivitajiet interattivi għat-tfal, kunċert korali mill-Kor prestiġjuż Cappella Musicale Caeciliana fl-Oratorju tal-Knisja tal-Ġiżwiti, u ċ-ċelebrazzjonijiet massivi annwali ta’ Lejlet l-Ewwel tas-Sena, li jagħmlu l-Belt Valletta l-qalba taċ-ċelebrazzjonijiet tal-Milied f’ Malta.
Dawn l-avvenimenti, li se jibqgħu għaddejjin matul ix-xahar kollu ta’ Diċembru, se jsiru fi sfond ta’ dwal u dekorazzjonijiet ikkuluriti madwar il-Belt. Din is-sena, l-Aġenzija Kulturali għall-Belt Valletta għamlet ukoll investiment f’dekorazzjonijiet ġodda għall-istaġun tal-Milied, inkluż siġra tal-Milied ġdida ddisinjata mill-artist ta’ fama lokali u internazzjonali Henry Galea.
Iċ-ċelebrazzjonijiet ta’ Lejlet l-Ewwel tas-Sena se jikbru wkoll, bil-parteċipazzjoni tal-istilla internazzjonali John Newman u b’wirja ta’ logħob tan-nar sorprendenti fil-Port il-Kbir grazzi għal kollaborazzjoni ma’ Visit Malta.
Il-Milied fil-Belt Kapitali jibda uffiċjalment fil-25 ta’ Novembru fis-18:00, hekk kif id-dwal tal-Milied jinxtegħlu għall-ewwel darba mill-personalitajiet lokali Jamie u Taryn. Is-siġra tal-Milied il-ġdida se tiġi żvelata wkoll dakinhar, flimkien ma’ prestazzjoni mill-kor Centrestage fi Pjazza Ħelsien.
“Il-Milied fil-Belt Valletta huwa żmien speċjali fejn il-kultura, it-tradizzjoni u l-ferħ jingħaqdu f’esperjenza waħda unika,” qal il-Ministru għall-Kultura, l-Artijiet u l-Gvern Lokali Owen Bonnici. “Permezz ta’ Christmas in the Capital 2025, qed inkomplu nsaħħu l-identità kulturali tagħna u noħolqu spazji fejn in-nies jistgħu jgawdu flimkien, jirriflettu u jiċċelebraw l-ispirtu tal-Milied. Dan l-investiment juri l-impenn kontinwu tal-Gvern biex il-Belt Valletta tibqa’ qalb ħajja ta’ attivitajiet artistiċi u kulturali li jġibu l-ferħ lill-familji Maltin u lil dawk kollha li jżuru pajjiżna f’dan l-istaġun.”
“Il-Belt Valletta tieħu l-ħajja bid-dawl, il-mużika, u l-ispirtu ta’ komunità fil-Milied,” qal Jason Micallef, iċ-Chairmain tal-Aġenzija Kulturali għall-Belt Valletta. “Din is-sena, l-Aġenzija Kulturali għall-Belt Valletta investiet €650,000 fl-attivitajiet tal-Milied fil-Belt Valletta, li jinkludu l-organizzazzjoni taċ-Ċelebrazzjonijiet Nazzjonali tal-Lejlet l-Ewwel tas-Sena, biex tiżgura li l-Belt Valletta tħalli l-marka tagħha bħala l-qalba ta’ Malta matul dan l-istaġun. Permezz ta’ dan il-programm, mhux biss qed niċċelebraw it-tradizzjoni iżda wkoll noħolqu memorji ġodda li jgħaqqdu lin-nies flimkien fil-Belt tagħna.”
Il-Purċissjoni ta’ Ġesù Bambin tirritorna fit-18 ta’ Diċembru, u tibda mill-Knisja tal-Madonna tal-Vitorja fi Pjazza Kastilja fis-6:00 pm. Dan l-avveniment sagru, bil-parteċipazzjoni ta’ kor live, jiġbor familji u komunitajiet flimkien f’purċissjoni mdawwla bix-xemgħat li tiċċelebra t-twelid ta’ Ġesù Bambin.
Fit-23 ta’ Diċembru, il-Kor Cappella Musicale Caeciliana se jkun qed jagħmel prestazzjoni fl-Oratorju tal-Knisja tal-Ġiżwiti fi Triq l-Arċisqof, fejn se joffri serata ta’ mużika sagra u mument ta’ serenità u riflessjoni bejn is-6:00 pm u t-8:00 pm.
Christmas in the Capital 2025 joffri wkoll varjetà ta’ attivitajiet għal kull età. It-tfal jistgħu jiltaqgħu mal-elves ta’ Santa Klaws u jibagħtu wkoll ittri lil Santa Klaws fi Pjazza San Ġorġ u madwar il-Belt Valletta, kif ukoll jattendu attività ta’ Gootopia fil-Valletta Design Cluster fejn jistgħu jieħdu pjaċir bis-slime.