Ir-relazzjoni bejn il-logħob u s-saħħa mentali

Minn Kayne Said, Maniġer għal Komunikazzjoni – [email protected]

Ir-relazzjoni bejn il-logħob tal-azzard u s-saħħa mentali hi waħda kumplessa u delikata, u qed tiġi rikonox­xuta dejjem aktar bħala suġ­ġett ta’ importanza soċjali u klinika. Il-logħob jista’ jkun forma ta’ divertiment u passatemp, iżda għal ħafna persuni jista’ jsir sors ta’ stress, dipendenza u problemi mentali serji. Meta l-logħob jieħu post ċentrali fil-ħajja ta’ persuna, jistgħu jitfaċċaw diversi effetti negattivi fuq is-saħħa mentali tagħha.

Wieħed mill-ikbar riskji tal-logħob eċċessiv hu l-iżvilupp ta’ dipendenza – kundizzjoni magħrufa bħala “gambling disorder” jew “logħob kompulsiv”. Dan iseħħ meta l-individwu ma jkunx kapaċi jikkontrolla l-impuls li jilgħab, minkejja l-konsegwenzi ne­gat­tivi li jista’ jkun qed jiffaċċja f’ħajtu personali, professjonali u finanzjarja. Il-persuni affettwati jistgħu jidħlu f’dejn, ikollhom problemi ta’ relazzjoni, jitilfu l-impjieg, u fl-iktar każijiet gravi, jiġu affettwati minn ansjetà severa u saħansitra dipresjoni.

Għadd ta’ studji juru rabta qawwija bejn il-logħob problematiku u kwistjonijiet oħra ta’ saħħa mentali bħad-dipressjoni, l-ansjetà, l-abbuż mill-alkoħol jew sustanzi oħra, u r-riskju ta’ suwiċidju. 

Importanti nifhmu li l-problemi ta’ saħħa mentali jistgħu jkunu wkoll fattur li jwassal għall-logħob eċċessiv. Persuni li diġà qed iġarrbu pressjoni psikoloġika, dwejjaq emozzjonali jew problemi ta’ self-esteem, jistgħu jirrikorru għall-logħob bħala forma ta’ ħarba jew distrazzjoni. Dan joħloq ċiklu perikoluż, fejn il-logħob isir mekkaniżmu ta’ coping li fl-aħħar mill-aħħar jippersisti l-problema oriġinali u jżid magħha diffikultajiet ġodda.

Il-prevenzjoni u l-intervent huma kruċjali. Huwa vitali li l-persuni jiġu edukati dwar ir-riskji relatati mal-logħob u jkollhom aċċess għal informazzjoni u għajnuna pro­fessjonali. Servizzi bħal dawk ipprovduti minn Sedqa, Appoġġ u minnha għandhom rwol ewlieni biex jidentifikaw każijiet ta’ riskju, joffru terapija u appoġġ, u jippromwovu logħob b’mod responsabbli.

Il-professjonisti tas-saħħa mentali għandhom ikunu mħarrġa biex jidentifikaw sinjali ta’ logħob problematiku u jintegraw dan l-aspett fil-va­lutazzjonijiet tagħhom. Barra minn hekk, l-industrija tal-logħob għandha tirri­konox­xi r-responsabbiltà tagħ­ha u tieħu passi proattivi biex tipproteġi lill-utenti tagħha, pereżempju billi tuża strumenti ta’ esklużjoni, limiti fuq l-imħatri u messaġġi ta’ twissija. Fl-aħħar nett, is-saħħa mentali u l-logħob huma marbutin b’mod li ma jistax jiġi injorat. Il-fehim ta’ din ir-relazzjoni jista’ jwassal għal interventi aħjar, għal soċjetà aktar infurmata, u fuq kollox, għal ħarsien akbar tal-benesseri tal-individwu. Hu dmir kollettiv tagħna li nagħmlu l-logħob sikur u responsabbli, f’ambjent li jqis il-valuri tas-saħħa mentali u d-dinjità umana.