Minn Cristian Muscat
Kif bdiet l-imħabba tiegħek lejn il-basketball?
Kien għad kelli biss ħames snin meta missieri kien ħeġġiġni biex nibda nilgħab il-basketball. Wara l-ewwel sessjoni ta’ taħriġ mal-klabb mill-ewwel ħadt gost u minn hemm bqajt miexi u lgħabt fil-Kampjonat Nazzjonali sa m’għalaqt 17-il sena. Fl-istess żmien ta’ xi 15-il sena ħadt kors bażiku tar-referees li kien aspett differenti ħafna minn dak ta’ plejer, fejn illum il-ġurnata komplejt u saħansitra rreffjajt logħbiet minn finali tad-diviżjoni wieħed tal-kbar fil-Kampjonat Nazzjonali tal-MBA. Inħobb ħafna nsegwi klabbs tal-basketball tal-Ewropa u anke dawk Amerikani.
Iddeskrivi r-rwol tiegħek bħala fundatur ta’ All4Ball.
Fil-bidu tal-2022, missieri Josvick DeFlavia u l-plejer tat-tim nazjonali Nathan Xuereb kienu iffurmaw All4BAll tournaments and camps, u ftit wara meta raw li dan il-proġett kien hemm domanda għalih, daħlu lili u lil Isaac Xuereb biex niffurmaw tim, kulħadd b’għan wieħed li nkabbru n-namra tal-basketball u norganizzaw taħriġ speċjalizzat minn kowċis barranin u anke tournaments lokali u barra min xtutna.
Ir-rwol primarju tiegħi hu dak li nieħu ħsieb, disniji u promozzjonijie- tal kampijiet ta’ taħriġ, nieħu ħsieb il-paġni soċjali u x-xogħol ta’ wara l-kwinti. Minn dak iż-żmien ‘l hawn tgħallimt ħafna u anke l-materjal li qed joħroġ illum il-ġurnata huwa ħafna aktar ta’ kwalitá. Xogħol sabih u jirrikjedi ħafna ħinijiet f’qasir żmien.
L-ewwel avveniment li konna għamilna kien ġewwa Sqallija u l-ewwel kamp ta’ taħriġ lokali seħħ f’Diċembru 2023, fejn kellna ħafna players li attendew u saħansitra kellna nieqfu naċċettaw ir-reġistrazzjonijiet minħabba nuqqas ta’ riżorsi.
Wara dawn, żiedna kamp ieħor fl-Għid il-Kbir u ieħor fl-aħħar tas-sena fejn attendew b’kollox aktar minn 250 plejer. Fil-bidu tas-sena ġietni idea li norganizzaw l-ewwel tournament taż- żgħar ta’ 3×3, li kienet xi ħaġa unika għal Malta għal dawn l-etajiet u mal-fundaturi l-oħra mal-ewwel skatta l-pjan li norganizzawh.
Aghtina d-dettalji kollha rigward l-youth 3×3 tournament li organizzajtu f’pajjiżna għall-ewwel darba matul il-jiem li għaddew.
Dan it-tournament kien maqsum f’żewġ kategoriji. L-ewwel kategorija kienet għat-tfal li twieldu bejn l-2012-2014. Kellna ħames timijiet tas-subien u tim wieħed tan-nisa bl-isem ta’ F.A.K.E., li finalment spiċċaw rebħu t-tournament. Il-kategorija l-oħra kienet għat-tfal li twieldu bejn l-2009-2011 li ntrebħet mit-tim bl-isem ta’ REGULATORS. Kull kategorija lagħbu tliet weekends sħaħ infila, dejjem jikkompetu kontra xulxin u jtellgħu l-punti. Imbagħad f’ Awwissu 23 u 24, intlagħbu l-play-offs. F’dan iż-żmien ukoll organizzajna kompetizzjoni tat-trippli – ukoll l-ewwel kompetizzjoni ta’ dan it-tip għaż-żgħar li qatt seħħet f’Malta u qanqlet interess.
Nixtieq ukoll nuża din l-intervista biex nirringrazzja lill-parteċipenti u lill-familji tagħhom kollha talli dejjem emmnu fina u kienu parti minn dawn l-avventimenti li jagħmlulna kuraġġ inkomplu.
X’tikkummenta fuq il-livell tal-basketball f’pajjiżna fil-preżent?
Nemmen li għad hemm ħafna xogħol li jrid isir, kemm mill-klabbs, imma l-iktar mit-tfal infushom u l-ġenituri tagħhom. Din tidher evidenti ħafna meta nkun qiegħed nirreffja, speċjalment meta nkun qed niggwida referees oħra. Hawn ħafna klabbs u kowċis f’dawn il- klabbs li jridu l-ġid għat-tfal, kemm fuq il-court u anke barra minnu, peró għandhom ukoll il- limiti tagħhom minħabba fondi allokati għalihom biex jorganizzaw u anke biex jitgħallmu jkabbru t-talenti tagħhom. Min-naħa l-oħra il-plejers iridu jaċċettaw il-fatt li l-livell Malti huwa dak li hu, biss iridu jagħmlu l-parti tagħhom u jkomplu jaħdmu u jirsistu għal rashom u anke jitħalltu f’kompetizzjonijiet jew taħriġ bħalma norganizzaw aħna speċjalment jagħtu importanza fil-‘fundamentals’ u jitgħallmu r-regoli, jirrispettaw lil min qed jgħallimhom u lill- ġenituri tagħhom għas-sagrifiċċji li jagħmlu.
Hemm bżonn ukoll li l-komunitá tal-basketball f’pajjiżna tingħaqad. Hemm ħafna piki, bejn klabbs u ġenituri, li minħabba fihom, jispiċċaw ibatu l-plejers. Aħna m’aħniex assoċjati mal- ebda klabb lokali u minn hawn inħeġġu l-klabbs li jinkpraġġixxu lit-tfal tagħhom imorru għal dawn it-tournaments u kampijiet ta’ taħriġ ħalli jkomplu jkabbru t-talenti tagħhom u jitħalltu ma’ livelli differenti għax hekk biss, nistgħu ngħinu biex jogħla l-livell lokali.
Il-courts ta’ Ta’ Qali huma tajbin, peró, bħal kollox nemmnu wkoll li dejjem hemm bżonn ta’ iktar postijiet anke fi skejjel tal-Gvern fejn dan l-isport jista’ jiġi pprattikat. Hemm bżonn li jkun hemm użu ta’ fondi Ewropej biex inkabbru u nkomplu ntejbu l-atmosfera u r-riżorsi fil- komunitá.
Kif qed tħares lejn il-futur tiegħek fl-amministrazzjoni tal-basketball?
Mill-aspett tal-All4BAll, il-futur tagħna huwa sempliċi … li nkomplu norganizzaw it-tournaments u l-kampijiet ta’ taħriġ għat-tfal ta’ taħt is-16-il sena, filwaqt li dejjem intejbu u ninvestu fix-xogħol li qegħdin nagħmlu. Inkomplu nħeggu lill-Malta Basketball Association (MBA), il-klabbs u l-kowċis lokali biex jgħinuna fuq il-proġetti li nkunu qed norganizzaw u nibqgħu nħeggu l-plejers ta’ kull livell biex ma jaqtgħux qalbhom imma jibqgħu jistinkaw ħalli naraw avvanz f’dan il-qasam.
Nixteq ukoll li jibda jkollna fondi ħalli ma nillimitawx ruħna f’dak li hemm ippjanat fil-futur. Nibqgħu nistinkaw biex naraw iktar kusxjenza fil-qasam tal-media socjali, fejn hawn nirringrazzjak għal dan l-artiklu, ħalli l-basketball ikollu iktar exposure fil-kamp lokali.
Għaddi messaġġ finali lil min jixtieq jibda jipprattika l-basketball u jkollu karriera ta’ suċċess f’dan l-isport.
Irsisti, u ddedika ruħek għal kull ħaġa li tkun qed titgħallem, waqt li dejjem isma’ minn dawk li jridu jgħallmuk. L-iktar ħaġa importanti, issir kemm issir tajjeb, qatt tinsa minn fejn bdejt, u li xorta waħda dejjem baqa’ x’titgħallem. Dejjem irrispetta lil sħabek, il-kowiċs u r-referees. Seqwi l-logħob lokali u internazzjonali ħalli titgħallem u pprattika kemm tista’. Dejjem sib bilanċ bejn studju u prattika u kollox ikun possibli!