Is-Segretarju Ġenerali tan-Nazzjonijiet Uniti António Guterres appella lill-pajjiżi tad-dinja kollha biex jagħtu l-għajnuna tagħhom lill-Pakistan hekk kif dan il-pajjiż sofra bil-kbir f’għargħar qawwi kkawżat minn xita torrenzjali. Guterres qal dan hekk kif żar dan il-pajjiż u qal li l-kaġun ewlieni ta’ dan id-diżastru hu t-tibdil fil-klima. Il-gvern tal-Pakistan huwa tal-istess fehma.
Xita qalila tal-monsoon kif ukoll silġ glaċier li nħall fil-muntanji tat-Tramuntana wasslu għal għargħar qalil li kisser għadd ta’ djar, toroq, linji tal-forroviji u pontijiet filwaqt li qered għadd ta’ għelieqi u provvisti ta’ ikel. B’kollox hu kkalkulat li xejn inqas minn 1,391 persuna tilfu ħajjithom.
Dan id-diżastru naturali wassal biex meded kbar ta’ art spiċċaw mgħarrqin taħt l-ilma u kawża t’hekk eluf kienu dawk li kellhom jitilqu minn djarhom.
Il-gvern tal-pajjiż qal li dan id-diżastru mess il-ħajja ta’ kważi 33 miljun persuna. Fid-dawl ta’ dan, Guterres qal li, “jien nappella għal appoġġ qawwi mill-komunità internazzjonali hekk kif il-Pakistan qiegħed jipprova jirrispondi għal dan il-katastrofu klimatiku.”
