Is-Sibt, 14 ta’ Diċembru, il-Malta Motorsport Federation ser torganizza l-Enemed Malta Motorsport Awards għal din is-sena, fis-Sala Cettina De Cesare fil-Lukanda Intercontinental f’San Ġiljan.
L-Enemed Malta Motorsport Awards huma xhieda tad-dedikazzjoni u l-passjoni tal-komunità tal-motorsport. Kull sena, il-Federazzjoni tistieden lill-klabbs affiljati magħha biex jinnominaw persuna biex tirċievi rikonoxximent mill-Federazzjoni f’isem il-klabb. Il-persuna magħżula mill-klabb tkun xi ħadd li l-klabb iħoss li għandu jiġi rringrazzjat għas-sehem tiegħhu jew is-suċċess fid-dixxiplina partikolari tal-isport. Jistgħu jiġu nominati helpers, uffiċjali, xufiera, membri tal-kumitat, fotografi, u anke spettaturi regolari. Il-kompitu tal-MMF hu li tagħti lil din il-persuna u lill-klabb l-aħjar ċans possibbli biex jirringrazzjaw lil din il-persuna.
Minbarra dawn il-premjijiet relatati mal-klabbs, jkun hemm ukoll premjijiet mogħtija direttament mill-Federazzjoni stess; dawn jinkludu premju għall-Marshall tas-Sena, l-Uffiċjal tas-Sena, u l-aktar żewġ premjijiet prestiġjużi jkunu l-President Award u l’Hall of Fame Award. Dan tal-aħħar jingħata lil persuni b’għomor ta’ dedikazzjoni jew involviment fl-isport tal-karozzi.
Il-preżenza ta’ kull min iħossu parti mill-komunità tal-isport tal-muturi, fl-Enemed Malta Motorsport Awards hija apprezzata ħafna, u kullħadd jista’ jattendi għaċ-ċerimonja billi jakkwista biljetti online mill-websajt tal-Malta Motorsport Federation.
