Friday, August 8, 2025

IS-SOLITUDNI: FENOMENU JEW PROBLEMA?

Aqra wkoll

Huwa fatt rikonoxxut li aktar ma popolazzjoni tixjieħ, aktar jitfaċċawlha każijiet ta’ solitudni. Dan huwa fenomenu li mhux qed ikun osservat biss f’pajjiżna, imma jinstab ukoll f’diversi pajjiżi, avvanzati u mhux, madwar id-dinja. 

Is-solitudni fl-adulti anzjani jista’ jkollha kemm impatti pożittivi kif ukoll negattivi fuq il-benesseri tagħhom, u l-Għaqda Dinjija tas-Saħħa (WHO) tirrikonoxxiha bħala kwistjoni sinifikanti tas-saħħa pubblika.

Filwaqt li xi adulti anzjani jistgħu jippreferu jew jibbenefikaw mis-solitudni, oħrajn jistgħu jesperjenzawha bħala fattur ta’ riskju għal diversi problemi ta’ saħħa.

L-Organizzazzjoni Dinjija tas-Saħħa tirrikonoxxi l-importanza li jiġu indirizzati l-iżolament soċjali u s-solitudni fil-popolazzjonijiet anzjani.

Quddiem dawn ir-realtajiet soċjali jkun opportun li naraw sew x’qed isir f’pajjiżna biex kemm jista’ jkun intaffu l-problema tas-solitudni tan-nies speċjalment fost l-anzjani li jgħixu waħedhom. 

Ma nistgħux ma nsemmux li llum il-ġurnata hawn għarfien akbar dwar dan is-suġġett emottiv. U ta’ dan ma nistgħux ma nkunux kuntenti. Biss biss żdiedu s-servizzi offruti kemm mill-istat u anki mill-knisja u għaqdiet mhux governattivi. Sa anke żdiedu ċ-ċentri li nfetħu fil-komunità biex wieħed ikollu l-opportunità li jitkellem ma’ ħaddieħor u b’dan il-mod jħossx waħdu, li huwa maqtugħ mill-bqija tass-soċjeta.

Hemm ukoll linji tat-telefon miftuħa 24 siegħa kuljum għal dawk li jħossuhom waħedhom u jkunu jridu jitkellmu ma’ xi ħadd. Dan ukoll joħroġ mill-fatt illi ħafna mit-telefonati li jsiru fuq stazzjonijiet tar-radju differenti fis-sigħat bikrin ta’ filgħodu ħafna minnhom ikunu anzjani li jċemplu għax iħossuhom waħedhom. 

Minbarra s-sapport kollu li joffri l-Gvern, isiru wkoll inizjattivi minn żmien għal żmien minn għaqdiet jew individwi li jkunu lesti biex jilqgħu individwi li għaddejjin minn xi problemi simili. Fost dawn hemm il-Fondazzjoni Caritas Malta li taħdem b’mod kontinwu ma’ dawn il-persuni, fix-xhur kollha tas-sena.

Dan l-aħħar, din il-Fondazzjoni nediet ukoll studju kwalitattiv li jiffoka fuq l-anzjani li jgħixu waħedhom. Minn dan l-istudju ħarġu punti interessanti fosthom id-differenza bejn l-irġiel u n-nisa billi filwaqt li n-nisa jħossu aktar is-solitudni bħala sentiment emozzjonali, l-irġiel iktar affettwati bl-element prattiku. Anke l-elementi ta’ staġuni jaffettwaw billi fix-xitwa jidlam kmieni kontra s-sajf li jista’ jinstigak toħroġ. 

Għalhekk, dak li ġie rikmandat f’dan l-istudju, li għandu jitkattar is-sens komunitarju u nkabbru l-ispazji biex l-anzjani jkollhom iktar fejn imorru għandu jiġi materjalizzat. Nemmnu wkoll li l-anzjani għandhom ħafna kontribut x’jagħtu lis-soċjetà filwaqt li jistgħu wkoll jgħaddu l-esperjenzi tagħhom lill-ġenerazzjoni żagħżugħa, anke fuq il-postijiet tax-xogħol jew fl-iskejjel. Għalhekk infaħħru kull sforz li qed isir biex l-anzjanità attiva tibqa’ tingħata l-prijorità li tixraqilha. L-attività tista tkun ukoll rimedju li jtaffi s-solitudni.

ĦALLI RISPOSTA

Jekk jogħġbok ikteb il-kumment tiegħek!
Jekk jogħġbok iktebismek hawn

Sport