Minn Cristian Muscat
Kif bdiet l-imħabba tiegħek lejn l-atletika?
L-imħabba tiegħi għall-atletika bdiet wara li ppruvajt diversi sports meta kont żgħir. Bdejt nipprova ħafna attivitajiet sportivi minn meta kelli ħames snin, iżda minkejja li gawdejt minnhom, qatt ma ħassejt li kienu għalija. Kollox inbidel meta skoprejt l-atletika—hemmhekk ħassejt li veru sibt il-passjoni tiegħi. Issa li għandi sittax-il sena, dik il-passjoni li sibtha meta kont żgħir kompliet tikber u ssaħħaħ maż-żmien.
X’suċċessi maġġuri rnexxielek tikseb sa issa f’dan l-isport li tant tħobb?
S’issa kelli diversi suċċessi li għalija jfissru ħafna. Fl-2022, irnexxieli nirbaħ sitt midalji tad-deheb fil-Kampjonati Nazzjonali. Dak l-istess sena, fil-Brno Athletics Games, ħadt id-deheb fil-150m u l-fidda fir-relay 4x60m.
Fl-2023 erġajt ksibt riżultat importanti f’Brno fir-Repubblika Ċeka meta rbaħt il-fidda fit-300m.
Fl-2024 ġejt magħżul biex inirrappreżenta lil Malta fil-FISEC Games f’Bucharest, ir-Rumanija, fejn irnexxieli nirbaħ id-deheb fil-400m u fir-relay 4x100m, u midalja tal-fidda fir-relay Żvediż.
Fl-2025 kont l-iżgħar atleta fit-tim li ħa sehem fil-Logħob tal-GSSE, u rnexxieli nirbaħ midalja tal-fidda u ninkiser rekord nazzjonali fir-relay 4x400m tal-irġiel, nieqes 0.01 sekonda biss mid-deheb. Aktar tard, ħadt sehem fil-Kampjonati Ewropej tat-Timijiet, fejn kont parti mir-relay 4x400m mixed, u ksibna rekord nazzjonali ieħor.
F’Lulju mort għall-FISEC Games f’Budapest, u hemm irnexxieli nirbaħ għat-tieni darba konsekuttiva d-deheb fil-400m, kif ukoll id-deheb fir-relay Żvediż b’rekord nazzjonali, u midalja tal-fidda fir-relay 4x100m.
Barra minn hekk, għandi wkoll diversi rekords nazzjonali fil-300m u fil-400m, li huma pass importanti fil-karriera tiegħi ta’ atleta.
Kif tqis il-livell tal-atletika f’pajjiżna fil-preżent?
L-atletika fil-pajjiż tagħna qed tikber, iżda għad hemm ħafna spazju għall-iżvilupp. Għandna atleti żgħażagħ talentużi u kowċis impenjati, iżda kultant l-isport jonqsu mill-istruttura, ir-riżorsi u l-investiment fit-tul meħtieġa biex nilħqu livelli internazzjonali ogħla. B’sistemi ta’ appoġġ aħjar, faċilitajiet imtejba u aktar espożizzjoni għal kompetizzjonijiet ta’ livell għoli, il-livell tal-atletika lokalment jista’ jogħla b’mod sinifikanti.
U dak tar-riżorsi fejn titħarrġu u jkollkom il-kompetizzjonijiet uffiċjali tagħkom?
Ir-riżorsi li għandna huma tajbin. Xi faċilitajiet għandhom bżonn xi manutenzjoni jew tiġdid, speċjalment għal taħriġ aktar speċjalizzat. Il-kompetizzjonijiet huma organizzati tajjeb, iżda forsi hemm bżonn ta’ superfiċijiet u tagħmir ta’ kwalità aħjar. Minkejja dan, l-atleti u l-kowċis jagħmlu l-aħjar użu minn dak li hemm. B’investiment xieraq, dawn ir-riżorsi jistgħu jitjiebu b’mod sostanzjali u jitilgħu għal livell ħafna aktar għoli.
Kif qed tħares lejn il-futur tiegħek fl-atletika?
Inħares lejn il-futur tiegħi fl-atletika b’ħafna ambizzjoni u impenn. Qiegħed nimmira li nkompli ntejjeb il-prestazzjoni tiegħi, speċjalment billi innaqqas il-ħinijiet u nżid il-konsistenza fil-kompetizzjonijiet.Il-mira tiegħi hija li nirrappreżenta lil pajjiżi f’kompetizzjonijiet ta’ livell aktar għoli, u nkompli nikber bħala atleta.
Kemm fuq livell nazzjonali kif ukoll internazzjonali, irrid nibqa’ nimxi ’l quddiem u nieħu l-aħjar minn kull staġun. Waħda mill-akbar ħolmijiet tiegħi hija li xi darba nikkompeti fl-Olimpjadi, li għalija tkun l-ogħla sodisfazzjon fil-karriera tiegħi ta’ atleta.
Għaddi messaġġ finali lil min jixtieq jagħmel karriera ta’ suċċess fl-atletika.
Jekk trid karriera fl-atletika, ftakar dan: it-talent jista’ jiftaħlek il-bieb, imma d-dedikazzjoni hija dik li żżommok hemm ġew. Kun paċenzjuż, kun konsistenti, u qatt tnaqqas mill-importanza tax-xogħol iebes.
Iċċaħħadx ruħek minn nies tajbin madwarek, isma’ lill-kowċis tiegħek u emmnu fil-proċess. Is-suċċess ma jiġix minn lejl għan-nhar, iżda jekk tibqa’ ffukat u impenjat, kollox possibbli.
