Għaddew kważi xahrejn mindu tħabbar b’ħafna pompa u b’ħafna ċerimonji is-suppost ftehim biex jitwaqqfu l-attakki mill-Gvern ta’ Netanyahu fuq Gaża. Ħafna ttamaw li l-waqfien mill-attakki kien se jfisser verament waqfien mill-attakki. Ma ġarax hekk. Filfatt llum hu kkonfermat li sa mid-9 ta’ Ottubru sa l-aħħar sigħat, xejn inqas minn 350 Palestinjan inqatlu f’Gaża minn attakki ġodda minn Iżrael. Minn dawn 136 kienu tfal.
Quddiem dak li għadu għaddej, u quddiem it-tbatijiet kbar tal-poplu f’Gaża jistkenn f’żoni bit-tined mgħarrqa minn ilma imħallat mad-drenaġġ, ma nistgħux ma nistaqsux dan xi pjan ta’ paċi kien? Xi ftehim hu dan u x’hemm eżattament warajh? Dan il-ftehim hu tkomplija b’mod differenti, biex tibqa’ t-tbatija għall-poplu Palestinjan? Biex jibqa’ għaddej it-tindif etniku?
Ma ninsewx li bl-attakki f’Gaża mill-Gvern ta’ Netanyahu, inqatlu kważi 80,000 persuna. Illum hu stamt minn riċerka li ġiet pubblikata li l-imwiet minn dawn l-attakki minn Iżrael ħallew aktar minn 100,000 persuna bla ħajja.
U waqt li ħafna ħarġu jfaħħru dan is-suppost ftehim u siktu wara għal dak li kien għaddej, ħadd mhu jiftaħ ħalqu dwar l-effetti indiretti ta’ dawn l-attakki. Għaliex qegħdin jiġu injorati dawn l-effetti?
Min jitkellem mal-Palestinjani f’Gaża jew ma’ qrabathom f’pajjiżi oħra jgħidulek minn xhiex għaddejjin. X’qegħdin jesperjenza. L-effetti indiretti f’kull kunflitt ħafna drabi huma aktar serji u fit-tul. F’kull kunfitt, il-vittmi indiretti ta’ dak l-istess kunflitt jiġu kalkulati billi għal kull vittma diretta jiżdiedu erba’ xittmi indiretti. Dan ifisser aktar minn 300,000 vittma indiretta ta’ dawn l-attakki.
U dan jgħodd għal kunflitt fejn kien hemm xi forma ta’ kura tas-saħħa. Imma f’Gaża, dan tista’ tgħid ma jeżistix. Ġew imposti restrizzjonijiet drakonjani fuq kull tip ta’ għajnuna għal dawk li jgħixu f’Gaza. Ma’ dan imbagħad hemm l-użu tal-forza b’mod qalil u ippjanata. Aggressjoni li nistgħu ngħidu li kienet unika, għax rajna tfal jitbiċċu. Jiġu attakki, skejjel, sptarijiet u saħanistra anke nies li jmorru jistennew fi kju għal xi ftit ikel.
It-tieni fażi tas-suppost ftehim, Iżrael għandu jirtira minn Gaża okkupata. M’hemmx dubju imma li dan ma jidhirx li se jseħħ. Il-kummissjoni Iżraeljana li għandha tissorvelja t-tieni fażi, tidher li aktar moħħha biex tara kif se takkwista b’mod permanenti territorji Palestinjani ġodda.
L-attakki mhux vera twaqqfu. Bqajna naraw b’mod sistematiku attakki kontinwi, għalkemm b’inqas intensità minn qabel. Hu fatt li l-ħsieb tal-Gvern ta’ Netanyahu kien li Gaża titbattal. Ried li n-nies jitilqu. Sar minn kollox biex dan jitwettaq. Rajna attakki sistematiċi li litteralment kienu qegħdin jagħmlu tindif etniku.
Iżrael falla fl-attentat tiegħu li jkeċċi lill-Palestinjani u jokkupa l-Gaża.
U allura l-mistoqsija li trid issir hi dik ta’ għaliex ġie mbuttat dan il-pjan ta’ paċi b’tant pompa mill-President tal-Istati Uniti Donald Trump. Kunsiderazzjonijiet hemm ħafna. Illum imma tidher aktar minn qatt qabel, li dan is-suppost ftehim sar b’għand wieħed. Għan li ma ssemmiex. Dan hu dak li jaħbi l-falliment militari Iżraeljan milli jqanqal oppożizzjoni f’Iżrael. Il-ftehim jew is-suppost plan ta’ paċi sar biss biex isalva lil Gern ta’ Netanyahu. Pjan li jagħti l-kapaċità lil Gvern ta’ Netanyagy biex jimmanuvra. U allure issa qegħdin naraw il-bidla, flok Iżrael se jkun qiegħed jokkupa Gaża kollha u jkeċċi lill-Palestinjani ‘lbarra – ma ninsewx li anke issemmiet minn Trump bħala li ssir ‘kumpless turistiku’, Iżrael issa se juża l-inġinerija soċjali u politika biex jikseb l-istess għan u allura tkompli l-politika ta’ espansjoni territorjali minn Iżrael.
U proprju fl-aħħar jiem kellna l-famuża r-riżoluzzjoni tan-Nazzjonijiet Uniti dwar Gaza. Riżoluzzjoni li timponi realtajiet ġodda fuq il-Palestinjani, iżda ma timponi l-ebda restrizzjoni fuq Iżrael. Hi riżoluzzjoni li tistabbilixxi amministrazzjoni tranżitorja li teskludi kompletament lill-Palestinjani. Riżoluzzjoni dwar artijiet Palestinjani, li teskludi lill-istess Palestinjani. Din tistabbilixxi l-Forza Internazzjonali ta’ Stabbilizzazzjoni, li l-uniku kompitu tagħha suppost hu li toħloq sigurtà f’Gaza’ f’isem Iżrael, b’mod partikolari billi tiddiżarma gruppi Palestinjani.
U biex wieħed jifhem fejn iridu jmorru bis-suppost ftehim ta’ paċi, biżżejjed tara li din skont ir-riżoluzzjoni din il-forza trid topera f’kooperazzjoni mill-qrib ma’ Iżrael, jiġifieri se tkun inkarigata li tilħaq l-objettivi militari tal-Gvern ta’ Netanyahu u b’hekk tippermetti lil Iżrael jiddetermina ż-żmien u n-natura tal-irtirar gradwali maħsub tiegħu.
U bil-Palestinjani jirrifjutaw li jagħmlu diżarm għax m’hemm ebda garanzija, il-Gvern ta’ Netanyahu ha l-opportunità u ddikjara li mhux se jitlaq minn Gaża.
Quddiem dan, issa qasmu lil Gaża f’żewġ żoni. Żona li se tkun taħt kontroll Iżraeljan u forza militari internazzjonali li se tinbena mill-ġdid u żona oħra ‘ħamra’ li se titħalla meqruda kif inhi.
U xi jfisser dan. Ifisser li fl-aħħar mill-aħħar il-Gvern ta’ Netanyahu se jilħaq l-istess objettivi, bi pjan li jitlaq minn suppożizzjoni żbaljata li l-Palestinjani se jaċċettaw dak kollu li jkun impost fuqhom. M’għandna ebda dubju lit-tbatija Palestinjana se tkompli għaddejja. Żgur li hemm riskji li din it-tbatija tista’ tiggrava fix-xhur li ġejjin. Daqstant ieħor konvinti li tkompli r-reżiljenza Palestinjana.
