Uffiċjali Pakistani qed ifittxu ‘saħħar’ li sammar musmar ta’ żewġ pulzieri f’ras mara tqila sabiex twelled tifel minflok tifla. Il-musmar għadda zbrixx minn partijiet vitali tal-moħħ.
L-azzjonijiet strambi tas-‘saħħar’ jidhru li kienu parti minn sforz biex jiggarantixxi li l-omm ikollha tarbija tifel.
Il-prattika ta’ fejqan bil-fidi (faith healers) hija komuni fl-Asja u l-prattiki dubjużi tagħhom għandhom l-għeruq fil-mistiku tas-Sufi, li huma komuni l-iktar madwar il-Pakistan, minkejja li hemm diżapprovazzjoni minn ħafna, inklużi xi skejjel tal-Islam.
Fl-Asja t’Isfel speċjalment, tifel huwa maħsub li joffri sigurtà finanzjarja aħjar lill-ġenituri milli joffru l-bniet.
Il-mara waslet fi sptar fil-belt tal-Majjistral ta’ Peshawar wara li ppruvat hi stess tiġbed il-barra l-musmar bit-tnalji, spjega t-tabib Haider Khan.
Dr Khan, li neħħa l-musmar minn ras il-mara, qal li ‘Kienet f’sensiha għal kollox, iżda kellha uġigħ kbir’ .
L-omm ta’ tliet ibniet qalet li kienet tqila b’tifla oħra.
X-ray wera li l-musmar ta’ ħames ċentimetri (żewġ pulzieri) iddaħħal fil-kranju tan-naħa ta’ fuq ta’ ras il-mara iżda ma laqatx moħħ.
Dr Khan qal li martell jew oġġett tqil ieħor intuża biex jiġi msammar il-musmar.
Fil-bidu, il-mara kienet qalet lill-istaff tal-isptar li kienet hija stess li martellat il-musmar f’rasha fuq il-parir tal-‘faith healer’ iżda aktar tard qalet li kien hu li wettaq l-att.
Il-pulizija tal-belt ta’ Abbas f’Peshawar ġabru filmati tas-CCTV mill-isptar u jittamaw li jsibu lill-vittma f’tentattiv biex jidentifikaw u jaqbdu lis-saħħar.
