Wara li l-ġabra tal-borża s-sewda li kienet skedata li ssir nhar it-Tlieta li għaddew ma saritx minħabba l-maltempata kif kien tħabbar minn qabel, is-Sibt saret il-ġabra tal-borża s-sewda u l-proċess mexa tajjeb u mingħajr diffikultajiet maġġuri.
Fil-fatt il-ġabra tal-borża s-sewda s-Sibt saret fil-lokalitajiet kollha mill-kolletturi tal-iskart muniċipali li wettqu xogħol tajjeb. Dan kollu seta’ jsir ukoll frott il-koperazzjoni li l-pubbliku wera b’mod ġenerali in vista taċ-ċirkostanzi straordinarji li seħħew.
L-iskeda eżistenti tal-ġbir tal-iskart muniċipali hija waħda mill-fatturi importanti li bihom pajjiżna qed jirreġistra riżultati pożittivi fejn jidħol is-separazzjoni tal-iskart u l-ġbir tal-iskart organiku u riċiklabbli.
Isir appell ukoll lill-Oppożizzjoni biex il-kwistjoni tal-ġbir tal-iskart muniċipali ma tiddawwarx f’ballun politiku. Anzi wieħed jappella lill-Oppożizzjoni biex tingħaqad f’apprezzament lejn il-koperazzjoni li wera l-poplu lejn l-awtoritajiet matul il-perkors tal-jiem li għaddew.