Matul ix-xahar tal-Milied f’Għawdex jiġu organizzati bosta avvenimenti bl-għajnuna tal-Ministeru għal Għawdex u l-Ippjanar. Attivitajiet intiżi biex jattiraw aktar nies lejn din il-gżira. Fost dawn ikun hemm il-“Gozo Christmas Parade”, avveniment ieħor popolari li ta’ kull sena jiġi organizzat fil-lokalità tar-Rabat Għawdex u jattira bosta nies, mhux biss lokali iżda wkoll Maltin u barranin.
Din il-parata ssir is-Sibt ta’ qabel il-ġurnata li tfakkarna fit-twelid ta’ Ġesà Bambin. L-avveniment jibda minn Triq Fortunato Mizzi, tul Triq ir-Repubblika u jispiċċa bi sfilata fi Pjazza Indipendenza fejn jipparteċipaw diversi gruppi ta’ tfal bil-kostum bi żfin matul it-triq b’mużika kontinwa u moderna li tindaqq matul dawn il-ġranet tal-Milied. Il-parata tinvolvi ukoll karattri relatati mal-Milied kif ukoll diversi karattri ta’ cartoons populari fost it-tfal. Fl-aħħar tal-parata kien hemm snow man kif ukoll karru kkulurit b’Father u Mother Christmas.
Wara l-isfilata, fi Pjazza Indipendenza, ittellgħet is-sitt edizzjoni tal-kunċert spettakolari tal-Milied mill-grupp DCapitals Big Band b’mużika popolari tal-milied u bis-sehem ta’ diversi kantanti u żeffiena f’nofs din il-pjazza.
Ritratti Joe Grech
