Il-Ministru għall-Kultura, l-Artijiet u l-Gvern Lokali Owen Bonnici inawgura wirja ġdida li tiċċelebra Jum il-Vitorja fil-Palazz tal-Gran Mastru, il-Belt Valletta. Din il-wirja se tibqa’ miftuħa għall-pubbliku sal-Ħadd 14 ta’ Settembru, u hija kkumplimentata minn katalgu u pubblikazzjoni ġdida.
Il-Ministru Owen Bonnici qal f’din is-sena li qed nfakkru l-460 anniversarju mir-rebħa tal-Assedju l-Kbir, il-wirja, bit-titlu ‘It-8 ta’ Settembru: L-Ewwel Jum Nazzjonali’, qed nitfgħu dawl fuq tliet avvenimenti storiċi formattivi għall-ġens Malti: it-tmiem tal-Assedju l-Kbir fl-1565, il-kapitulazzjoni tal-Franċiżi fl-1800, u d-dikjarazzjoni tal-armistizju mill-Italja fit-Tieni Gwerra Dinjija fl-1943.
“Din il-wirja mhux biss tfakkarna fl-istorja kbira ta’ pajjiżna, imma tpoġġi kollox f’kuntest ċar ta’ kif il-poplu Malti dejjem irnexxielu joħroġ rebbieħ minn mumenti diffiċli, grazzi lill-Heritage Malta għal din il-wirja li tgħaqqad l-arti, ir-riċerka u l-memorja kollettiva tagħna f’esperjenza waħda. Ħolqa oħra sabiħa fl-identità kulturali tagħna,” temm jgħid il-Ministru Bonnici.
Il-wirja, li qed tittella’ fis-Sala tat-Tron, tiġbor fiha għadd imdaqqas ta’ artefatti mill-kollezzjoni nazzjonali, li qed jiġu esebiti flimkien għal din l-okkażjoni. Fost oħrajn, b’rabta mal-Assedju l-Kbir insibu l-affreski ta’ Matteo Perez d’Aleccio li hemm fil-Palazz tal-Gran Mastru stess, akkumpanjati minn inċiżjonijiet u mapep, kif ukoll medalji u muniti tas-seklu sittax.
Il-kapitulazzjoni Franċiża hija rrakkontata permezz ta’ tliet platti kbar tal-fidda li kienu offruti mill-Maltin lill-Ingliżi u medalji mogħtija lil eroj Maltin wara l-imblokk tal-1798–1800, kif ukoll sunett miktub bl-idejn mill-qawwiet Maltin bħala parti mit-tħejjijiet għaċ-ċelebrazzjonijiet tar-rebħa. Aktar qrib żminijietna mbagħad, pistola ta’ uffiċjal Taljan flimkien mal-istoċċ tagħha, stampa tal-1943 tal-Bambina tal-Isla, u gazzetta oriġinali tad-9 ta’ Settembru 1943 jieħdu lill-viżitatur fl-aħħar mumenti tat-Tieni Gwerra Dinjija f’pajjiżna.
Katalgu bilingwi illustrat jikkumplimenta l-esperjenza u huwa għall-bejgħ fil-ħanut tal-Palazz.
Heritage Malta nediet ukoll pubblikazzjoni ġdida bl-isem ‘Grand Master Jehan de Vallete’. Miktub mill-istoriku magħruf Prof. Carmel Cassar, il-ktieb jippreżenta ħarsa lejn il-ħajja tal-Gran Mastru li mexxa lill-Ordni waqt l-Assedju l-Kbir u waqqaf il-Belt Valletta. Din il-pubblikazzjoni hija disponibbli online minn heritagemalta.mt/store/grand-master-jehan-de-vallete-hero-of-the-ottoman-siege-of-malta-and-founder-of-valletta/, kif ukoll mill-ħanut tal-Palazz.
Il-wirja ‘It-8 ta’ Settembru: L-Ewwel Jum Nazzjonali’ hija miftuħa kuljum bejn l-10:00amu s-6:00pm (l-aħħar dħul fil-5:30pm), u hija inkluża fl-esperjenza tal-Palazz tal-Gran Mastru, li huwa wkoll aċċessibbli għal persuni li jużaw siġġu tar-roti. Għal aktar tagħrif żur heritagemalta.mt/whats-on jew segwi l-mezzi soċjali ta’ Heritage Malta.