Minn Cristian Muscat
Kif bdiet l-imħabba tiegħek lejn it-taekwondo?
Bdejt it-Taekwondo meta kelli 12-il sena wara li kien hemm ħabib tiegħi li kien ħajjarni nara sessjoi ta’ taħriġ ta’ din l-arti marzjali. Waqt li kont qed nara din is-sessjoni bqajt imsaħħar bil-movimenti li bdew jagħmlu żewġ atleti partikolari li kienu qed jagħmlu dik li huma sejħulha sparring. Kif bdejt nara, iktar għamlu ħin jaqbżu u jpoġġu saqajhom fl-arja milli fuq l-art. Wara li rajthom, bejni u bejn ruħi bdejt ngħid li jien irrid nagħmel bħalhom. Kien hemm li bdejt dan l-isport u li bih bdejt ukoll nieħu sehem f’kompetizzjonijiet lokali. B’xorti ħażina kelli nieqaf għal xi żmien minħabba xi problemi personali li kelli. Minkejja kollox, irritornajt u komplejt fejn ħallejt u mhux talli hekk, talli sibt ukoll il-klabb li verament xtaqt u li kburi ngħid li hu wieħed minn dawk li hu ferm prestiġġjuż f’pajjiżna.
Ħa mmur mal-ewwel għall-punt. Proprju fil-jiem li għaddew irbaħt midalja atd-deheb f’kompetizzjoni prestiġjuza tat-taekwando fil-Ġermanja. Agħtina iktar dettalji, fosthom kif preperajt għal din il-kompetizzjoni u x’fisser dan is-suċċess uniku għalik persnali?
It-Taekwondo huwa fiċ-ċentru ta’ ħajti! Bħala sid ta’ klabb, għandi l-privileġġ li nitħarreġ mal-istudenti u l-atleti tiegħi stess, li ħafna minnhom issa huma kompetittivi ħafna (internazzjonalment) u kklassifikati tajjeb fiċ-ċirkwit kontinentali. Inħoss li l-esperjenza tiegħi tgħinhom ukoll. Nitħarrġu kważi kuljum fil-klabb tagħna f’Santa Venera; u meta ma nkunux qed nitħarrġu jew nisparaw, inkunu qed nagħmlu sessjonijiet ta’ saħħa u kondizzjonament biex inżommuna ppreparati fiżikament u b’saħħitna għall-isfida li jmiss. Huwa impenn kontinwu u xi ħaġa li nagħmel bil-kompetizzjonijiet jew mingħajrhom. Nagħmlu għax irrid nibqa’ f’forma u nibqa’ nipprattika l-isport li nħobb.
Kull rebħa hija għażiża l-ewwelnett għax hija r-riżultat ta’ xogħol iebes wara l-kwinti. Iżda wkoll, għax ix-xewqa tiegħi li nipprattika l-isport twieldet minn karriera turbolenti ħafna. Il-karriera tiegħi kienet imdawra bi problemi fil-livell ta’ assoċjazzjoni. Dawn il-problemi wassluni biex nieqaf mill-isport (kontra r-rieda tiegħi stess). Meta rritornajt u erġajt bdejt nitħarreġ, kelli l-opportunità li nkompli nipprattika bħala atleta tal-masters grazzi għall-ħafna opportunitajiet disponibbli li issa jaqdu din id-diviżjoni li qed tikber.
Mingħajr nuqqas ta’ inkoraġġiment mill-istudenti u l-atleti tiegħi stess, iddeċidejt li nagħtiha ċans ieħor u nirringrazzja lil Alla għal dan, għax stajt inkompli nieħu gost b’dan l-isport li tant inħobb! Issa, kull rebħa hija xi ħaġa li niddedika lilhom, għax ma nkunx nista’ nikseb dawn il-midalji li kieku ma kienx għall-appoġġ kontinwu tagħhom. Din ir-rebħa kienet speċjalment sinjifikanti għax marti u t-tlitt itfal tiegħi kienu hemm biex isegwu kollox; għalhekk l-avveniment kollu kien mument imprezzabbli li jibqa’ mnaqqax għal dejjem f’memorja tiegħi. Nixtieq nirringrazzjahom kollha (speċjalment lil marti) li l-appoġġ imprezzabbli tagħhom jippermettili ngawdi din il-logħba sabiħa.
U proprju ftit jiem wara dan is-suċċess, ksibt suċċess inkredibbli ieħor din id-darba f’Wales. Agħtina iktar dettalji.
Ninsab kuntent bir-rebħa li ksibt f’Wales. Kien test ieħor li juri li dak li qed nagħmlu u x-xogħol li qed nagħmlu flimkien (bħala tim) qed jagħti l-frott. Fl-età tiegħi, mhux faċli. Irrid inlaħħaq mat-tfal ħafna iżgħar minni. Imma fortunatament huma wkoll qed jimmotivawni biex nagħmel preċiżament dan. Kull kompetizzjoni – rebħa jew telfa – hija sempliċement ċelebrazzjoni ta’ dak ix-xogħol iebes. Post fejn kollox joħroġ b’mod sfrenat.
Għalija, ċerti emozzjonijiet jistgħu jinstabu biss fuq it-tapit tatami. Ikun ħasra li nħallu dan imur.
X’tikkummenta fuq l-unuri prestiġjuż li rbaħt fix-xhur ta’ qabel?
Naħseb li dan l-unur li rbaħt kien il-premju ta’ ħafna xogħol u taħriġ iebes li għamilt. L-aħħar midalja tad-deheb li rbaħt fi Brussell waslet fi żmien meta kelli staġun ferm u ferm intensiv. Kienet ukoll l-ewwel sena bħala atleta Masters u ma kinitx biċċa xogħol faċli li nlaħħaq mat-taħriġ, kompetizzjonijiet u xogħol. Trid tqis ukoll li ridt inlaħħaq max-xogħol u mal-familja. B’xorti tajba għandu tim warajja u familja li tagħtini ħafna sapport u li tagħtini ħafna kuraġġ. Biex stajt inżomm din il-midalja f’idejja dan kollu kien grazzi għalihom. Għax wara kollox ir-rebħa qatt m’hi garantita. Iżda meta jkollok xi ħaġa tanġibbli f’idejk u li din tkun fl-isport li tħobb, bla dubju li tħossok kuntent. Kien mument li diffiċli ninsa kemm se ndum ħaj.
Kif tqis il-livell ta’ Taekwondo f’pajjiżna?
Jien qed nara li qed isir progress. Biex intik eżempju, atleta żagħżugħa waslet saħansitra sas-sitt post tar-ranking fl-Ewropa. Qed nipparteċipaw b’suċċess f’kampjonati bħal Grand Prix, Kampjonati tad-Dinja u numru ta’ kompetizzjonijiet ta’ livell għoli. Barra minn hekk, l-atleti Maltin li qed jipparteċipaw qed jirbħu xi midalji wkoll. Minkejja li n-numri tagħna huma żgħar bħala parteċipanti, qed naħdmu bla heda. Aħna napprezzaw ħafna wkoll ix-xogħol li qed isir mill-Malta Taekwondo Association li qed jaħdmu qatigħ biex jagħtu s-sapport neċessarju lill-atleti. Huma qed jagħmlu dan b’mod volontarju mingħajr ma jaqilgħu l-flus. Naħseb li kulħadd qed jiġbed ħabel wieħed, imur għal riżultati pożittivi u fuq kollox jieħu pjaċir jipparteċipa u fuq kollox jirbaħ.
Kif qed jirnexxielek tlaħħaq max-xogħol u mat-Taekwondo?
B’xorti tajba, ħafna mix-xogħol tiegħi llum il-ġurnata jdur bejn Taekwondo u taħriġ. Jien personali naħdem bħala strength and conditioning coach u litteralment iffissat fuq in-nutrizzjoni u l-fitness li narahom ferm importanti, kif l-atleti sħabi jistgħu jikkonfermaw. Hekk kif jien litteralment qiegħed f’din id-dinja tat-Taekwondo, naħseb li nsibha iktar faċli li nkun parti minn dan l-isport.
Kif qed tħares lejn il-futur tiegħek fit-Taekwondo?
Nixtieq nikkompeti u nitħarreġ kemm jista’ jkun. Mhux bilfors għall-midalji iżda biex nispira lill-atleti tiegħi biex jagħmluha aktar u aktar, indipendentement mir-riżultati miksuba. Nixtieqhom ħafna li jieħdu pjaċir u jkollhom ħajja mimlija saħħa, kollu bl-influwenza sabiħa li kapaċi jitrażmetti t-Taekwondo. Sakemm il-Bambin jagħtini s-saħħa, nixtieq ħafna li jkolli iktar żmien involut f’din il-logħba, dejjem sakemm ġismi jibqa’ jiflaħ!
Għaddi messaġġ finali lil min jixtieq jibda jipprattika t-Taekwondo.
Għalija t-Taekwondo hu iktar minn sport. Jagħtik is-saħħa u l-karattru li eventwalment jagħmlek bniedem dixxiplinat. Il-lezzjonijiet li jtik imorru lil hinn minn sempliċement tagħti xi punch jew inkella xi kick. Bis-saħħa tat-Taekwondo, għamilt ħafna ħbieb u bnejt ukoll familja sabiħa. Għalija dan hu sport li jtik ħafna pjaċir u li hu intensiv iżda li jtik ħafna sodisfazzjoni. Inħeġġeġ lil kulħadd biex jippruvah!