L-FA Taljana qed tikkunsidra bidla kbira fir-regola tal-offside bil-konsegwenza li twassal għal aktar goals.
Il-bidliet, żviluppati mill-ex coach ta’ Arsenal, Arsene Wenger, jaraw li l-pożizzjoni ta’ offside tingħata biss jekk ikun hemm spazju ċar bejn l-attakkant u d-difensur.
Wenger ilu jitkellem dwar ix-xewqa tiegħu li jagħmel bidliet fir-regola tal-offside iżda kien konxju tad-diffikultajiet biex jimplimenta kwalunkwe tibdil.
Fl-2020 huwa kien qal: “L-għan tiegħi, kif ukoll tal-FIFA, huwa li kontinwament naħseb dwar modi kif intejbu l-logħba tagħna.
“M’għandniex nibżgħu niddibattuhom fil-pubbliku.
“Iżda naf sew li kwalunkwe tibdil fir-regoli huwa suġġett għal proċess ta’ approvazzjoni.
“Dan jinkludi diskussjonijiet mal-partijiet interessati u fażijiet potenzjali tat-test, fl-ambitu tal-qafas stabbilit tal-IFAB.”
Il-proposta ġiet spjegata lura fi Frar qabel l-ewwel prova tagħha fil-Kampjonat Taljan ta’ Taħt it-18-il sena minn Christos Kanellas, manager tal-prestazzjoni tal-FIFA.
Huwa qal: “L-idea twieldet biex tipromwovi logħba aktar offensiva, iżżid iċ-ċansijiet tal-goals u tagħmel il-logħba aktar eċċitanti.”
Il-President tal-FIGC, Gabriele Gravina qal: “L-FA Taljana tinsab fuq quddiem nett fl-iżvilupp tal-logħba.
“Aħna għamilna lilna nfusna disponibbli biex inkomplu nesperimentaw fil-kampjonat ta’ Taħt it-18-il sena għax l-innovazzjoni tinsab f’demmna.
“Ma nibżgħux mill-bidla kemm fil-ground kif ukoll barra u, f’sinerġija mill-qrib mal-FIFA, se nkomplu nistudjaw l-effetti ta’ bidla fir-regola tal-offside.”
Matteo Trefoloni, kap tas-settur tekniku, spjega l-mod kif se tinbidel il-liġi.
Huwa qal: “L-esperiment jgħid li player m’għadux meqjus bħala punibbli jekk xi parti tal-ġisem li biha jista’ jiskorja goal tkun konformi mad-difensur ta’ qabel tal-aħħar.
“Għalhekk, sabiex l-offside jiġi sanzjonat bejn l-attakkant fl-iktar pożizzjoni avvanzata u d-difensur, irid ikun hemm ‘l hekk imsejjaħ dawl, jiġifieri għandhom ikunu separati viżwalment.”
Il-bidla fir-regola ġiet ippruvata għall-ewwel darba, f’April 2022, f’35 partita.
Il-players, il-coaches, u r-referees li pparteċipaw fl-istħarriġ taw opinjoni ġenerali pożittiva.
Huma indikaw impatt imnaqqas tal-bidla proposta fuq il-logħba u żieda ġenerali fl-opportunitajiet ta’ skor.
