It-Tenur Malti Joseph Calleja se jkanta numru ta’ kanzunetti favoriti lill-pubbliku Malti permezz ta’ kunċert li se jinġieb fi djarna grazzi għall-kollaborazzjoni bejn il-Bank of Valletta, NNG Promotions u numru ta ’artisti internazzjonali.
Il-kunċert, appoġġjat mill-Bank of Valletta, inġibed matul il-ġimgħat li għaddew f’xi wħud mill-isbaħ lokalitajiet madwar Malta u Għawdex, speċifikament għall-Milied 2020.
L-Interpretazzjoni ta’ Calleja tal-kanzunetta popolari tal-Milied ‘Adeste Fideles’ inġibdet fil-Bażilika maestuża ta’ San Duminku fil-Belt Valletta, waħda mill-ifjen xhieda tal-ġenju tal-artist Malti Giuseppe Cali, jew ix-Xitan bil-pinzell kif kien magħruf.
Meta kien qed jitkellem dwar din l-inizjattiva, il-Kap Eżekuttiv tal-BOV Rick Hunkin qal, “Din kienet sena tassew straordinarja għal kulħadd, żmien ta’ inċertezza hekk kif adattajna u biddilna dak kollu li qisna bħala’ l-ħajja normali. Bħala l-Bank tal-Maltin, aħna kburin li nkun assoċjati ma’ din il-prestazzjoni tat-Tenur Malti hekk kif Joseph Calleja jagħti rigal bil-kanzunetta lilna lkoll. L-għażla tal-Bażilika ta’ San Duminku bħala waħda mis-settings għall-kanzunetti ta ‘Joseph Calleja ġejja mir-rabtiet tagħna ma’ din il-binja storika..
“Giuseppe Cali, bħal Calleja, ħalla marka il-wirt artistiku ta’ Malta u fil-Bank of Valletta aħna kburin li appoġġajna dan il-proġett fi Knisja li tiftaħar b’ħafna xogħlijiet tiegħu. Jien ħerqan ħafna li nara Tenur kbir Malti jinterpreta il-kanzunetti fi Knisja mpittra minn artist ġenju Malti,” kompla l-Kap Eżekuttiv tal-BOV.
Ir-restawr tal-pitturi Cali fis-saqaf tal-Knisja kif ukoll il-pittura titulari tiegħu ‘San Duminku fil-Konfrontazzjoni mal-Eretiċi’, kienu appoġġjati mill-Bank of Valletta. Cali twieled il-Belt Valletta u tgħammed f’din il-Bażilika, u l-parti l-kbira tad-dekorazzjoni ta’ ġewwa ġġib il-firma tiegħu.
“F’isem kulħadd fil-Bank of Valletta, nawguralkom il-Milied it-Tajjeb mimli saħħa hekk kif inħarsu ‘l quddiem għal sena aħjar.”
Tista tgawdi lil Joseph Calleja jinterpreta Adeste Fideles fil-Bażilika ta’ San Duminku fuq YouTube fuq https://youtu.be/XoU5SCj9L0g
Il-Kunċert tal-Milied ta’ madwar siegħa ta’ Joseph Calleja se jixxandar nhar il-Milied fis-1 pm fuq TVM.
