Rigward sistema ta’ gwardjan legali temporanju għal minuri li ma jkunux akkumpanjati u li jkunu qegħdin ifittxu l-ażil li kompliet tiġi diskussa fil-parlament, il-kelliema għall-Ugwaljana u d-Drittijiet tat-Tfal f’isem l-Oppożizzjoni Graziella Attard Previ qalet li jeħtieġ li niffukaw fuq dawn it-tfal bħala tfal u mhux bħala immigranti.
Hija fakkret fid-diskors tal-President Emeritus Marie Lousie Coleiro Preca li kienet qalet li dawn it-tfal jeħtieġ li rridu nieħdu ħsiebhom daqslikieku kienu t-tfal tagħna.
Attard Previ qalet li t-tfal m’għandhomx jibqgħu f’ċentri ta’ detenzjoni ma adulti li l-anqas biss ikunu jafu u li wara li jaħarbu l-ħajja tal-gwerra, il-persekuzzjoni u l-ġuħ għandhom jiġu integrati fis-soċjetà tagħna.
Il-kelliema tal-Oppożizzjoni qalet li dawn it-tfal ibatu minn diversi kundizzjonijiet li jaqsmulek qalbek u li meta taħdem ma’ dawn it-tfal tagħmel minn kollox biex tħares l-interessi tagħhom u tkun tista’ toffrilhom dak li hu tagħhom bi dritt.
“Bl-invażjoni fl-Ukrajna, hemm ċans li l-problema ta’ dawn it-tfal tkompli tiżdied”, kompliet Attard Previ filwaqt li kompliet issostni li dawn it-tfal qatt m’għandhom jinżammu fiċ-ċentri ta’ detenzjoni. Qalet ukoll li hawn tfal li jinżammu għal żmien twil f’ċentri ta’ detenzjoni sakemm ikun żgurat li dawn huma verament tfal minħabba li ma jkollhomx dokumenti u li dan id-dewmien m’għandux jibqa’ aċċettabbli.
