It-tim nazzjonali tal-Beach Soccer bl-aħħar tħejjijiet għar-round preliminari tat-Tazza tad-Dinja
It-tim Nazzjonali Malti tal-Beach Soccer qed iżid it-tħejjijiet finali tiegħu qabel l-ewwel parteċipazzjoni tiegħu fil-Pre-Qualifiers Ewropej fit-Tazza tad-Dinja tal-FIFA tal-Beach Soccer.
Din se tkun l-ewwel darba għall-Malta Beach Soccer Team fil-Pre-Qualifiers tat-Tazza tad-Dinja tal-FIFA, li se jintlagħbu f’Baku, l-Azerbaigan, bejn il-Ħadd u t-Tlieta li ġejjin.
Waqt Press Briefing li introduċa u ta aktar dettalji dwar din il-parteċipazzjoni għat-Team Nazzjonali tal-Beach Soccer, il-Viċi President tal-Malta FA Dr Matthew Paris wassal il-gratitudni tiegħu lejn l-isponsors Visit Malta u Nestlé Ice Cream Malta għall-kontribut tagħhom biex jgħinu fit-tkabbir tal-Beach Soccer f’Malta.
Il-Viċi President tal-Malta FA reġa’ afferma wkoll il-wegħda u l-impenn tiegħu ta’ ftit xhur ilu, fejn wiegħed f’isem il-Malta FA li mmorru pass ‘il bogħod milli nipparteċipaw biss, iżda tabilħaqq mistennija tospita avveniment internazzjonali tal-Beach Soccer fi xtutna ‘l quddiem, li biha nieħdu vantaġġ sħiħ mill-klima favorevoli u bajjiet sbieħ li dan il-pajjiż jippossjedi u b’hekk ikun hemm ambjent perfett għal avvenimenti bħal dawn.
In-Nestle Ice-Cream Marketing Manager Joe Cutajar tenna l-impenn tal-kumpanija rrapreżentata minnu u l-fiduċja f’dan il-proġett tal-Beach Soccer f’Malta mmexxi ‘l quddiem mill-Malta FA u permezz tal-ftehim ta’ sponsorship tagħhom, fix-xhur li ġejjin se jħaddan ukoll il-proġett imminenti u r-realtà li jospita avveniment internazzjonali tal-Beach Soccer ta’ profil għoli f’pajjiżna.
Il-Kap tal-Beach Soccer fi ħdan il-Malta FA Mark Marlow emfasizza l-fatt li l-plejers tat-Tim Nazzjonali ilhom jagħmlu taħriġ sostanzjali matul dawn l-aħħar ġimgħat biex jiżguraw l-aħjar tħejjija possibbli kemm fiżikament kif ukoll mentalment fl-isforzi tagħhom biex jiksbu riżultati pożittivi fi Grupp B tal-Preliminari, fil-jiem li ġejjin kontra timijiet f’pożizzjoni ogħla fir-rankings tal-FIFA Beach Soccer, bħal-Litwanja, ir-Repubblika Ċeka, u l-Iżvezja.
Marlow se jmexxi lid-delegazzjoni ta’ Malta li se tivjaġġa lejn Baku fil-jiem li ġejjin għal dawn il-Pre-Qualifiers Ewropej tat-Tazza tad-Dinja.
