It-Tim tal-Water Polo tan-Nisa ta’ Sirens ikkompleta rebħa storika tal-kompetizzjonijiet domestiċi kollha dan l-istaġun, u temm il-kampanja notevoli tagħhom b’rebħa ta’ 17-14 kontra San Giljan fil-Finali tan-Knockout tal-BOV tan-Nisa.
Sirens ħadu vantaġġ kmieni f’logħba missielta, b’Kaia Agius tiftaħ l-iskor minn xutt minn sitt metri. Thea Abdilla malajr ġabet id-dro għal San Giljan, iżda Agius reġgħet skorjat fir-raba’ minuta biex reġgħet tat il-vantaġġ għal Sirens. Chloe Amato kabbar il-vantaġġ għal 3-1 bi 3:30 minuti mit-tmiem tal-ewwel sessjoni. Lob intelliġenti minn Kendra Navarro u konklużjoni qawwija minn Margarita Plevritou raw lil Sirens minn fuq 5-1. San Giljan wieġbu permezz ta’ Abby Bonello u Elise Gatt, u għalqu l-ewwel sessjoni b’riżultat ta’ 5-3 favur it-tim minn San Pawl il-Baħar.
Fit-tieni sessjoni, Denise Micallef u Agius għamlu l-iskor 7-3 għal Sirens. Gatt skurjat San Giljan, iżda Sirens marru minn fuq b’gowls minn Amato, Micallef, u Martha Perici Ferrante, u għamlu l-iskor 10-4. Ella Miceli żiedet gowl għas-Saints, iżda gowls oħra minn kull naħa minn Micallef u Elena Borg għalqu t-taqsima b’riżultat ta’ 11-6.
San Giljan għamlu rimonta qawwija fit-tielet sessjoni. Borg u Bonello naqqsu d-distakk, u hat-trick brillanti minn Profokieva, inklużi żewġ penalties, ġabu l-iskor indaqs 11-11. Il-kaptan Maia Bonello mbagħad tat lil San Giljan l-ewwel vantaġġ tal-logħba. Madankollu, il-Captain ta’ Sirens Micallef wieġbet biex temmet is-sessjoni 12-12.
Fl-aħħar sessjoni Sirens ħadu lura l-kontroll tal-logħna. Agius u Plevritou skorjaw kmieni biex għamlu l-iskor 14-12. Profokieva żammet lil San Giljan fil-logħba, iżda Sirens reġgħu kabbru l-vantaġġ b’gowls minn Zaira Bartolo u Agius. Gatt reġgħet naqqset id-distakk iżda Agius issiġillat ir-rebħa b’gowl deċiżiv sitt sekondi biss mit-tmiem.
Wara li kienu diġà rebħu l-kampjonati BOV tax-Xitwa u wkoll dak tas-Sajf, Sirens daħlu fil-Finali tan-knockout b’għan wieħed: li jiksbu staġun perfett. Għamlu preċiżament dan bi prestazzjoni b’saħħitha kontra s-Saints. Din id-dominanza tal-waterpolo tan-nisa lokali saret saħansitra aktar speċjali hekk kif seħħet fis-sena tal-100 Anniversarju tal-Assoċjazzjoni tal-iSport Akkwatiku ta’ Malta.
It-tim irċieva t-Trofew Knockout mingħand Stefan Abela, Manager tas-CSR fil-Bank of Valletta u Karl Izzo, President tal-ASA. Dan it-trofew issa jingħaqad mal-oħrajn ta’ Sirens, u jissimbolizza staġun ta’ eċċellenza bla paragun.
Is-sħubija dejjiema tal-Bank of Valletta mal-ASA hija strumentali fit-tkabbir u s-suċċess tad-dixxiplini akkwatiċi madwar il-pajjiż. Hekk kif l-ASA tiċċelebra l-100 anniversarju tagħha, l-investiment kontinwu tal-BOV huwa xhieda tal-impenn tiegħu lejn l-isport Malti. Din il-kollaborazzjoni mhux biss trawwem il-ġenerazzjonijiet futuri ta’ atleti iżda ssaħħaħ ukoll il-kburija nazzjonali u l-ispirtu komunitarju permezz taċ-ċelebrazzjoni tal-eċċellenza sportiva.