Real Madrid ġew ikkritikati għan-nuqqas ta’ paċenzja tagħhom fuq l-eks midfielder stilla, Martin Odegaard.
Odegaard ngħaqad b’mod famuż ma’ Los Blancos bħala żagħżugħ ta’ 16-il sena fl-2015, wara li ġie mmarkat bħala player tal-futur ta’ klassi mondjali, iżda l-ingaġġ tiegħu tħabat biex jaqbad f’Madrid.
Wara perjodi ta’ self fi Spanja u l-Olanda, huwa ngħaqad ma’ Arsenal b’self għal sitt xhur, f’Jannar 2021, bil-karriera tiegħu mibdula bħala riżultat.
Mikel Arteta għażel li jiffirmah b’mod permanenti fl-2022, qabel ma għamlu captain fl-2023, bħala figura kruċjali fit-taqtiegħa tagħhom għat-titlu tal-Premier League dan l-istaġun.
Il-wirjiet impressjonanti ta’ Odegaard taħt Arteta qajmu mistoqsijiet dwar x’seta’ ġara f’Madrid bil-programm tar-radju Spanjol, Carrusel Deportivo, jiddiskuti l-mixja tiegħu lejn il-quċċata.
“Bl-evoluzzjoni li kellu Odegaard fl-2023, kien bla dubju jibda mill-bidu ma’ Real Madrid”, stqarr Antonio Romero.
“Ma kienx hemm biżżejjed paċenzja mal-player. Odegaard kien captain tan-Norveġja ta’ Taħt il-21 sena, u ta’ Arsenal ta’ 23”, żied Bruno Alemany.
“Real Madrid ma kellhomx il-paċenzja ma’ Odegaard li kellhom ma’ players oħra.”
Odegaard kien il-captain tan-Norveġja fit-telfa tal-ftuħ tagħhom ta’ 3-1 għall-kwalifikazzjoni għall-Euro 2024 kontra Spanja f’Malaga hekk kif id-debuttant Joselu kiseb rebħa ewlenija għal-coach il-ġdid, Luis de la Fuente.
Madankollu, l-involviment ewlieni tiegħu ġie permezz ta’ daħla kerha minn Rodri ta’ Manchester City, b’Odegaard isostni li tagħha kien ħaqqu jingħata penalty, iżda kkonferma li ma saret l-ebda ħsara mill-injury li sofra.
