Hija drawwa li qabel kull elezzjoni, partiti politiċi joħorġu bi proposti li dwarhom jibbażaw il-programm elettorali tagħhom. Normalment il-proposti jiġu deċiżi wara diskussjoni wiesgħa fi ħdan il-partiti li jikkontestaw għall-elezzjoni. Il-Partit Laburista għall-elezzjoni tal-2022, kien ħareġ b’1,000 proposta f’manifest li semmieh “Malta Flimkien”. Ladarba dawn il-proposti kienu approvati, allura ssawru fil-wegħdiet li l-partit irid iwettaq tul il-mandat tiegħu fil-Gvern.
Il-maġġoranza tal-proposti tal-Gvern fil-manifest elettorali kienu riflessi fil-budgets ta’ dawn l-aħħar tliet snin. Tant hu hekk li t-Tlieta li għadda, il-Prim Ministru ġie rrapportat jgħid li aktar minn 66% tal-manifest elettorali diġà twettaq. Dan ifisser li fadal ftit inqas minn terz tal-proposti x’jiġu implimentati.
Fost dawk li twettqu s’issa hemm proposti sinifikanti bħaż-żieda rekord fl-allowance tat-tfal, tnaqqis sostanzjali fit-taxxa tad-dħul, żidiet kontinwi fil-pensjonijiet u ferm aktar minn hekk, li jinkludi wkoll titjib fil-qasam tal-ambjent b’investiment qawwi f’ġonna u proġetti ta’ spazji ħodor u miftuħa għat-tgawdija tal-familji Maltin u Għawdxin.
L-għadd ta’ proposti li ġew imwettqa huma sinjali ċari li l-Gvern Laburista, iwettaq dak li jwiegħed u jwiegħed dak li jista’ jwettaq. Minkejja l-proposti li ġew elenkati fil-budget, b’danakollu huwa fatt li l-Gvern jgħaddi wkoll biex iwettaq miżuri oħra li jistgħu jespandu ma’ proposti oħra indikati fil-manifest, fosthom il-miżuri u l-inċentivi intenzjonati li jnaqqsu l-problema tat-traffiku mit-toroq ta’ pajjiżna.
Wieħed ma jridx jinsa jsemmi l-proġetti kbar li qed iseħħu fil-qasam tal-enerġija kemm fis-sistema eżistenti u kif ukoll dak li huwa maħsub fil-futur f’dik li hija enerġija rinovabbli, bħal proġetti ta’ enerġija mir-riħ li dwarha diġà ġiet estiża d-data għas-sottomissjoni ta’ interess rigward dawn il-proġetti.
Minkejja dan ix-xogħol kollu li sar, nemmnu li għad fadal xi jsir biex aktar miżuri tal-manifest jitwettqu fosthom it-trakka tal-karozzi li għandha żżid ma’ proġetti sportivi oħra li diġà saru. Għalhekk, nistennew li x-xogħol biex jiġu mwettqa l-proposti li fadal jingħata spinta ‘l quddiem, biex ikunu twettqu kemm jista’ jkun miżuri msemmija fil-manifest elettorali tal-2022.
Għandna għax nifhmu li l-ħidma kollha li saret sa issa tissarraf fi kwalità ta’ ħajja aħjar għall-familji Maltin u Għawdxin kollha.
