Ivana Trump, l-ewwel mara tal-Eks President tal-Istati Uniti Donald Trump, mietet fl-età ta’ 73 sena. F’kumment li tella’ fuq il-midja soċjali tiegħu, Trump kellu biss kliem ta’ tifħir lejn l-eks mara tiegħu u qal li hija kienet ta’ ispirazzjoni kbira f’ħajtu. Flimkien huma ġenituri ta’ tlett itfal – Donald Jr, Ivanka u Eric Trump.
Uffiċjali tal-Pulizija li tkellmu mal-aġenzija tal-aħbarijiet Associated Press qalu li kollox jindika li l-mewt kienet waħda aċċidentali. Sorsi qalu ma’ din l-aġenzija li Ivana nstabet mejta qrib taraġ u għalhekk is-suspetti huma li hija waqgħet.
Ivana Trump kienet imwielda fir-Repubblika Ċeka u żżewġet lill-Eks President fl-1977. Huma ddivorzjaw 15-il sena wara. Donald u Ivana kienu koppja prominenti ħafna fi New York fis-snin 80 u 90, u d-divorzju tagħhom kien kiseb ħafna attenzjoni mill-midja. Wara s-separazzjoni, Ivana kienet bdiet avventura ġdida fi prodotti tas-sbuħija, ħwejjeġ u anke ġojjellerija.
Fl-2017 hija kienet ħarġet ktieb bl-isem ta’ Raising Trump fejn fih hija qalet li kienet hi li rabbiet lit-tfal u ħadet l-iktar deċiżjonijiet importanti għalihom — bħall-edukazzjoni u anke attivitajiet li jinvolvu ruħhom fihom.
Hija kienet qalet ukoll li wara d-divorzju, ir-relazzjoni tagħha ma’ Donald tjiebet tant li kienu jitkellmu darba fil-ġimgħa.
